Erteń 18 aqpanda saǵat 10.00-de Táýelsizdik saraıynda robototehnıkadan chempıonat ótedi. Jarysta elordalyq oqýshylar 3 sanat boıynsha ózara baq synasady: «Syzyq boıyndaǵy jarys», «Tapsyrmany oryndaý» jáne «Robosýma». Jarysqa 10-19 jas aralyǵyndaǵy balalar qatysa alady. Árbir komanda quramyna eki sportshy jáne bir robot kiredi.
Zııatkerlik qabiletti damytatyn shara QR Prezıdenti N.Nazarbaevtyń Qazaqstan halqyna arnalǵan Joldaýyn júzege asyrý, jastar men balalardyń ınnovasııalarǵa jáne joǵary tehnologııalarǵa qyzyǵýshylyǵyn arttyrý maqsatynda qolǵa alynǵan. Ony Astana q. Bilim basqarmasy «Astana daryny» óńirlik ǵylymı-praktıkalyq ortalyǵy «Bilim ınnovasııa» halyqaralyq qoǵamdyq qorymen birlese uıymdastyryp otyr.
Chempıonattyń jeńimpazdary men júldegerlerin marapattaý rásimi 19 aqpan kúni saǵat 10.00-de «Nur Orda» qazaq-túrik lıseıinde (Qoshqarbaev kósh., 34) ótedi. Júldeli oryndardy ıelengen quramalardyń jattyqtyrýshylaryna baǵaly syılyqtar tabystalady.
Robotehnıkadan chempıonat – tartysty jarys. Onyń barysynda jas daryndar túrli tapsyrmalardy minsiz oryndaıtyn robottardy qurastyrady. Shyǵarmashylyq saıys balalardy aqparattyq-telekommýnıkasııalyq tehnologııalarǵa jáne ǵylymı- tehnıkalyq shyǵarmashylyq jumystar tartýǵa baǵyttalǵan.