OQO-da bes jylda 47 myń otbasy baspanaly bolmaq

Turǵyndardy baspanamen qamtý búgingi kúnniń basty máselesiniń biri ekenin aıtqan Ońtústik Qazaqstan oblysynyń ákimi J.Túımebaev aldaǵy 5 jylda 4,8 mln.sharshy metr turǵyn úı paıdalanýǵa berilip, 47 619 otbasy baspanaly bolatynyn jetkizdi.

Esepti jıynda ákim baspanamen qamtamasyz etý boıynsha qajettilikterdi kezeń-kezeńimen sheshý úshin 2016 jyly 530 myń sharshy metr turǵyn úı tapsyrylǵanyn aıtsa, osy jyly jalpy 700 myń sharshy metr bolatyn turǵyn úıdi tapsyrý josparda turǵanyn aıtty.  Búginde 2017 jyly salynatyn 98 kóp qabatty jáne 4 018 jeke turǵyn úılerge qajetti ınjenerlik-kommýnıkasııalyq jelilermen qamtamasyz etý úshin bıýdjetten 11 mlrd. 732 mln.teńge bólinedi. «Aldaǵy 15 jylda elimizdiń turǵyndaryn tolyǵymen baspanamen qamtý maqsatynda elimizde jańadan «Nurly jer» baǵdarlamasy qolǵa alyndy.  Osy baǵdarlama sheńberinde jeke turǵyn úı qurylysy boıynsha Shymkent qalasynda pılottyq joba retinde eki kottedjdi qalashyqtar salynatyn bolady. Onyń biri 76 gektar alqapta 293 úı ornalasatyn «Bozaryq» kesheni men 180 gektar alqapta 1 050 úımen «Tasken» turǵyn úı kesheni boı kóteredi. Jalpy 5 jylda 529 kópqabatty jáne 25 736 jeke turǵyn úıge ınjenerlik ınfraqurylym júrgiziledi. Sonymen qatar, jıynda ákim kóp qabatty turǵyn úılerdi jańǵyrtý árbir otbasy úshin ózekti másele ekenin atap ótti.Osy rette,Shymkent qalasy men aýdan, qala ortalyqtarynyń sáýlettik kelbetin zamanaýı talaptarǵa sáıkestendirý, kópqabatty úılerdiń qasbetin jóndeý, aýmaǵyn abattandyrý máselesi de ózekti kúıde tur.        Oblysta jalpy 3 152 kópqabatty turǵyn úı bar. Onyń ishinde 1 581 kúrdeli jóndeýdi qajet etse, 183-inde qaıta jańǵyrtý qurylys jumystary aıaqtaldy. Nátıjesinde jóndeýdi qajet etetin úılerdiń úlesi 50,1%-dan 44,4%-ǵa deıin tómendetildi. Aldaǵy 4 jylda jalpy 488 kóp qabatty turǵyn úıge kúrdeli jóndeý júrgizilip, jóndeýdi qajet etetin úıler úlesin 28,8 paıyzǵa deıin tómendetý kózdelýde.