WBO Intercontinental jáne WBA Fedelatin tujyrymdary boıynsha birinshi orta salmaqta álem chempıony Qanat Islam AQSh-ta Robson Assısti jeńgennen keıin qandaı boksshylarmen jekpe-jekke shyqqysy keletinin aıtty.
«Endi Kottomen, Saýl «Kanelo» Alvarespen aıqasqym keledi. Men úlken jekpe-jekti qalaımyn. WBA reıtınginde tórtinshimin, WBO-da besinshimin. Kúndelikti tynbaı jattyǵyp júrmin», - dedi tikeleı efırde.
Aıta keteıik, birer aı buryn fightnews.com Qanattyń meksıkalyq Saýl Alvarespen urysy ótýi múmkindigi habarlaǵan. Qos tarap ortaq kelisimge kelgende kezdesý 6 mamyr kúni AQSh-tyń Tehas shtatyndaǵy 80 myń kórermenge arnalǵan «Dallas Kovboız» stadıonynda uıymdastyrylatyny da aıtylǵan. Alaıda, kóp uzamaı «Kanelonyń» kishi Chavespen aıqasatyny belgili boldy.