Taldyqorǵan qalasynda ótip jatqan Dúnıejúzilik boks serııasynda (WSB) qazaqstandyq «Astana Arlans» pen ózbekstandyq «Ozbek tigers» komandalary qolǵap túıistirdi. Úshinshi bolyp jekpe-jekke 69 kıloda Aslanbek Shymbergenov pen Shahram Gııasov shyqty.
Otandasymyz birinshi kezeńde qarsylasyn jaqyndatpaı, soqqylaryn týra baǵyttaǵan. Biraq Rıo Olımpıadasynyń kúmis júldegeri Gııasov ta qarap qalmady. Oraıy kelgen sátterdi qur jibere qoımady. Raýnd qorytyndysynda eki tóreshi jeńisti ózbekstandyq laıyq dep eseptegen eken.
Kezdesýdiń ekinshi úsh mınýtynda qos boksshy belsendilik tanytty. Alaıda, bul kezde tóreshiler biraýyzdan jeńisti Shahram Gııasovqa berdi.
Úshinshi raýndta jerlesimiz azdap abdyrap qalǵandaı kórindi. Degenmen, alǵa umtylýyn toqtatpady. Tipti, ózbek boksshysy óz aıaǵyna shalynyp qulap jatty. Nátıjesinde, bul kezeńde qos tóreshi jeńisti Aslanbekke berdi.
Tórtinshi raýndta Shymbergenov aıqyn basymdyqqa ıe boldy. Aıdarynan jel esip, adýyndy shabýyldarǵa shyqty. Shahram Gııasovtyń mańdaıyna tıgen soqqylardan muryny qanap ketetindeı kórindi. Bul ýaqytta tóreshilerdiń bári jeńisti otandasymyzǵa berdi.
Bastapqa tórt raýndtan keıin esep teńesti. Sheshýshi úsh mınýtta Aslanbek múmkindikterin jibere qoımady. Al Gııasovtyń erejege saı emes áreketteri kórinip jatty. Degenmen, bul raýndta kimniń basym bolǵanyn dál aıtý kórermender úshin qıyn boldy.
Nátıjesinde úshinshi bolyp rıngke shyqqan otandasymyz da jeńiske jetti.