Taldyqorǵan qalasyndaǵy Nazarbaev zııatkerlik mektebiniń oqýshysy Talǵat Bek elordada ótken «Uly Dala muragerleri» atty kórmede óz komandasynyń jobasyn tanystyrdy. Búginde atalǵan jobaǵa AQSh ǵalymdary qyzyǵýshylyq tanytyp otyr, dep habarlaıdy QazAqparat
Talǵattyń aıtýynsha, ótken jyly ol óz komandasymen birge ǵaryshta kúl-qoqysty jınaıtyn apparatty oılap tapty. Atalǵan spýtnık arnaıy zont arqyly orbıtadaǵy kúl-qoqysty jınap, ǵarysh apparattarynyń qaýipsizdigin qamtamasyz ete alady. «Búginde jyl saıyn jer orbıtasynda mıllıardtaǵan bólshekter aınalyp júredi. Ondaı kúl-qoqystar saǵatyna 27 myń shaqyrym jyldamdyqpen qozǵalady. Sondyqtan usaq nárseniń ózi jer serikterine úlken zaqym keltire alady. Al biz oılap tapqan apparattyń arqasynda orbıtany barlyq kúl-qoqystan tazarta almasaq ta, ǵarysh apparattarynyń qaýipsizdigin qamtamasyz etýge bolady. Ol zont arqyly dıametri 70 santımetr bolatyn bólshekterdi atmosferaǵa baǵyttaıdy. Sol jerde kúl-qoqystar tolyǵymen janyp ketedi», – dedi ónertapqysh.
Onyń aıtýynsha, ótken jyly Úndistannyń Nıý-Delı qalasynda ótken robototehnıkadan Halyqaralyq olımpıadada komanda osy jobamen bas júldeni jeńip alǵan. Sol jerde AQSh-tyń ǵalymdary jańa apparatqa qyzyǵýshylyq bildirip, taǵy bir jobany iske asyrýdy usyndy.
Nazarbaev zııatkerlik mektepteriniń jetistikterine arnalǵan «Uly Dala muragerleri» atty kórmede ulttyq qolóner, kórkemsýret, gobelen, panno jáne taǵy basqa qoldanbaly óner salasyndaǵy mektep oqýshylarynyń óz qolymen jasaǵan buıymdary, sondaı-aq robototexnıka, ǵarysh, munaı-gaz, ınfraqurylym jáne óńdeý ónerkásibi boıynsha oılap tapqan jobalary tanystyryldy.
Máselen, Qyzylorda qalasyndaǵy Nazarbaev zııatkerlik mektebiniń oqýshysy Vladımır Korıak kópdeńgeıli avtoturaq beketin qurastyryp shyqty. «Bul jobanyń negizgi ıdeıasy, beket avtókólikterdi avtomatty túrde turaqqa qoıa alady. Júrgizýshi óz kóligin jyljymaly bekettiń platformasyna qoıady da, turaqtaǵy oryndy kórsetedi. Avtomatty júıe kólikti ózi tıisti boksqa jetkizedi. Osy ispetti avtoturaqtyń taǵy bir artyqshylyǵy, aýdany jaǵynan qarapaıym avtoturaqpen birdeı bolsa da, odan da kóp kólikti syıǵyzdyra alady», – deıdi Vladımır.
Kórmede tanystyrylǵan taǵy bir jańalyq – búgingi zymyrantasyǵyshtardyń janar-jaǵar maıyn únemdeýge múmkindik beretin joba. Ony Taraz qalasyndaǵy Nazarbaev zııatkerlik mektebi usyndy.
Al Aqtaý qalasyndaǵy Nazarbaev zııatkerlik mektebiniń oqýshysy Ádilbek Abylaıhan «Smart home», ıaǵnı «aqyldy úı» jobasyn tanystyrdy. Ol búgingi tehnologııalardyń negizinde úıdegi temperatýrany rettep, sóndirmeı ketken jaryqty uıaly telefonnyń kómegimen óshirýge múmkindik beredi. «Ásirese, múmkindigi shekteýli azamattar úshin ondaı qyzmetterdiń bolǵany asa qajet. Mine, men uıaly telefonnan sıgnal jiberdim. Qazir negizgi kompıýter ony qabyldap, Bluetooth arqyly jaryqty óshiredi. Týra osy jolmen jaryqty sóndirýge bolady. Qazirgi kezde kóz qımylymen de biraz nárseni isteýge bolady», – deıdi Ádilbek.
Aqtóbe qalasyndaǵy Nazarbaev zııatkerlik mektebiniń oqýshysy Aqnur Baǵlanova bolsa, óz áriptesterimen munaı salasyna asa qajetti mobıldi qosymshany jasap shyǵardy. «Búginde sısternadaǵy munaıdyń kólemin ólsheý men esepteýdi qolmen júrgizip otyrady. Ondaı jumystar ýaqytty únemdeýge múmkindik bermeıdi. Al bizdiń mobıldi qosymshamyz arqyly barlyq ólsheý men esepteýdi avtomatty túrde júrgizýge bolady», – dedi Aqnur.
Kórmede ósimdik maılaryn tazalaý tehnologııasy da tanystyryldy. Ony Pavlodar qalasyndaǵy Nazarbaev zııatkerlik mektebiniń oqýshysy Adelııa Maqasheva ázirlegen. «Aldymen tabıǵı sazdy qyshqylmen modıfıkasııalaıdy. Sosyn men ony bir jýyp shyǵamyn da, silti arqyly ótkizemin. Odan keıin balshyqty taǵy jýamyn. Sóıtip, modıfıkasııalanǵan taza balshyqty alamyn. Ol arqyly ósimdik maılaryn tazartýǵa bolady», – deıdi Adelııa.
Aıta keteıik, Astanada ótken «Uly Dala muragerleri» kórmesi aıasynda muǵalimderge arnalǵan sheberlik sabaqtary da uıymdastyryldy.
Odan bólek, oqýshylar qoldanysqa engizgen tehnıkalarymen de tanystyrdy. Máselen, Atyraý qalasyndaǵy Nazarbaev zııatkerlik mektebiniń taǵy bir oqýshysy Sáttiǵalı Joldasbaı óz atasyna «aqyldy taqııany» jasap berdi. Semeıdegi Nazarbaev zııatkerlik mektebiniń oqýshysy Ádil Ordaev óziniń robottaryn «Qara jorǵa» bıletkizip qoısa, Nazarbaev zııatkerlik mektebiniń taǵy bir oqýshysy Abaı Loran Álmuhambetov otty dybyspen óshiretin qurylǵyny qurastyrǵan.