Shymkenttegi «Hımfarm» zaýyty 2016 jyly 22 mlrd. teńgeniń ónimin óndirip, onyń 70 paıyzyn shetelge eksporttaǵan, dep habarlaıdy QazAqparat.
Parlament Májilisi bıýrosynyń sheshimi boıynsha qurylǵan arnaıy komıssııa Ońtústik Qazaqstan oblysyndaǵy otandyq dári-dármek óndiretin birneshe kásiporyndy aralady. Degenmen, depýtattar Qazaqstanda óndirilgen farmasevtıkalyq preparattar halyqtyń qajettiligin tolyq óteı almaı otyrǵanyn jetkizdi.
Oblysqa arnaıy kelgen QR Densaýlyq saqtaý mınıstrligi medısınalyq jáne farmasevtıkalyq qyzmetti baqylaý komıtetiniń tóraıymy Larısa Paktyń sózinshe el naryǵyndaǵy dári-dármekterdiń sapasyn qatań tekserý úshin myqty zańdyq júıe kerek.
«Qazaqstanda satylatyn dári-dármekterdiń ataýy 70 myńǵa jýyq. Al onyń 54 paıyzy ǵana tekserilip úlgeriledi. Tyǵyryqtan shyǵar jol – otandyq dárilerdiń úlesin arttyrý», – deıdi maman.
Dári-dármekke suranys artqan saıyn Qazaqstandaǵy farmasevtıka salasyna sheteldik transulttyq kompanııalar kóptep enip jatyr. Bul qazaqstandyq farmasevtıkalyq kásiporyndardyń tynysyn taryltýda. Sondyqtan, Úkimet aldyndaǵy mindetti meje – otandyq dári-dármekter úlesin 50 paıyzǵa jetkizý bolyp otyr. Degenmen sońǵy 3 jylda tústik óńirdiń farmasevtıkalyq áleýeti 2 esege artqan. Osydan 20 jyl buryn elde farmasevtıka klasterin damytýǵa basa mán bergen Elbasy bul salany jiti baqylaýda. Sol sebepti, 2017 jyly kúngeılik kásipkerler 5 jobany iske qosýǵa nıetti. Bir ǵana «Hımfarm» AQ zamanaýı standartqa sáıkes keletin qatty dárilik formalar men sterıldi emes eritindilerdiń jańa túrin óndirmekshi.
Aıta keteıik, óńirde 1655-ke tarta dárihana bar. Alaıda, 836 eldi mekenniń 230-ynda dárihanalar tapshylyǵy seziledi. Farmasevtıka salasynyń mamandary 18 iri dárihanalar júıesiniń basshylaryna osy máseleni aldaǵy bir jylda tolyq sheshýdi tapsyrdy.