Aqpan aqyryp tur. Senbi-jeksenbi kúnderi Shyǵys Qazaqstannyń qutqarýshylary 65 adamdy qar qursaýynan qutqardy.
Oblystyq Tótenshe jaǵdaı departamentiniń mamandary turǵyndarǵa qalyń qardyń jaýatyny, boran soǵatyny jónindegi habarlandyrýlar der kezinde jiberilip jatsa da, buǵan qulaq asatyndardyń qatary az ekenin aıtady.
Demalys kúngi qutqarý jumystary negizinen «Semeı-Qaraýyl» jáne «Kishi Vladımırovka-Qaraǵaıly» trassasynda júrgizilgen. О́zderiniń jeńil mashınalarymen jolǵa shyqqan turǵyndar qalyń qarǵa batyp qalǵan. Osynyń kesirinen jol qozǵalysy shektelgen. Departamenttiń órt sóndirý jáne avarııalyq qutqarý jumystary qyzmetiniń mamandary «Semeı-Qaraýyl» trassasynyń 30 shaqyrymynda 31 adamdy qar qursaýynan shyǵarǵan. Onyń úsheýi – balalar. Jáne osy joldyń 50 shaqyrymynda taǵy da úsh jolaýshyǵa járdem kórsetilgen.
Qutqarýshylar dál osy ýaqytta Besqaraǵaı aýdany aýmaǵyndaǵy «Kishi Vladımırovka-Qaraǵaıly» trassasynyń 18 shaqyrymynda 21 adamǵa kómek qolyn sozady. Sonymen qatar «Shemonaıha-Sekısovka» trassasynyń 25 shaqyrymynda departament qyzmetkerleri jergilikti ákimdikpen birlese otyryp 10 kisini aq ulpanyń «qaqpanynan» alyp shyqqan.
Qar qursaýynan qutqarylǵan barlyq azamattar jylytý oryndaryna aparylyp, jaqyn mańdaǵy eldi mekenderge jetkizilgen kórinedi. Zardap shekken eshkim joq.
Sınoptıkter mundaı qolaısyz aýa raıy óńirde áli birneshe kúnge deıin saqtalatynyn aıtady. Departament qyzmetkerleri aımaq turǵyndaryna alys saparlarǵa shyqpaýdy eskertedi.
Azamat QASYM,
«Egemen Qazaqstan»