Táýelsizdiktiń ár kúni árbir azamattan úlken jaýapkershilikti, óz salasy boıynsha atqaratyn qajyrly da tabandy eńbegin talap etedi. Tarıh úshin 25 jyl az ǵana ýaqyt bolǵanymen, osy jyldar ishinde Qazaqstan zor jetistikterge jetti. Jetistikterdiń naqty mysaly men tizimin sanamalaı berseń, óte kóp. Eń bastysy, sol jetistik eldiń ıgiligine aınalyp otyr. Al ol jetistikterge jetý jolynda Prezıdent N.Nazarbaevtyń jyl saıynǵy dástúrli halyqqa Joldaýynyń alatyn mańyzy zor.
Ár Joldaýda el ómirindegi mańyzdy sharýalarǵa naqty baǵyt berilip, bolashaq jospardyń atqarylý joldary kórsetiledi. Bıylǵy Joldaýdyń ereksheligi sol, el damýyndaǵy jaqsy isterdi eseleı túsýge, jańa zaman, jańa ýaqyt talabyna saı áreket etýge aıqyn jol nusqady.
Joldaýda jańa tehnologııalardy meńgerý, halyqtyń ıgiligine jaratý máselesi egjeı-tegjeıli aıtylǵan. Qarap tursańyz, qazir dúnıe júzi tehnologııalyq damýdyń jańa ári jedel qarqynyna kóshken. Qazaqstan da sol tehnologııalyq jańalyqtan syrt qalmaı, órge bastar órkenıetti kóshten oryn alýy mindet. Ol – jastarǵa, keler urpaqqa kerek nárse.
Odan bólek, Joldaýda halyqtyń turmysyn jaqsartýǵa, áleýetin kóterýge qatysty da naqty dúnıeler aıtylypty. Halyq turmysy, áleýmettik jaǵdaıy, bala-shaǵanyń qamy degen qaı zamanda da mańyzdy másele bolǵan ǵoı. Sondyqtan, Joldaýda halyq turmysyn odan ári jaqsartýdyń amaldary anyq kórsetilgeni kóńil qýantady.
Prezıdent belgilep bergen basymdyqtarda aıtylǵan dúnıelerge biz de óz úlesimizdi qosamyz. Bizdiń qosar úlesimiz, ol – búgingi kórermenniń tanymy men talǵamyna jaýap beretin jańa spektaklder qoıý, teatrdyń repertýaryn baıytý, shyǵarmashylyq ujymynyń jan-jaqty tolysyp, ósýi, sapaly jumys. Sol arqyly eldiń ónerin shet elge shyǵaryp, ózge elderge kórsetý, nasıhattaý.
Memlekettiń baǵyt-baǵdaryn aıqyndap, ony halyqqa jetkizip otyrý – Prezıdenttiń mindeti. Sondyqtan, el men jerdiń jańa zaman kóshine ilesip, ýaqyt talabyna saı damýy úshin jasalǵan Joldaý talaptaryn oryndaý jolynda keleshekten úmiti men maqsaty bar adamnyń eshqaısysy tysqary qalmaýy tıis.
Asanáli ÁShIMOV,
KSRO halyq ártisi,
M.Áýezov atyndaǵy Qazaq memlekettik akademııalyq drama teatrynyń kórkemdik jetekshisi
ALMATY