QR Ádilet mınıstrligi Qazaqstanda arnaıy valıýtalyq rejımdi engizý mindetin Ulttyq bankke berýdi usynyp otyr, dep habarlaıdy QazAqparat.
«Qazirgi kezde atalǵan rejım Úkimet aktisimen engiziledi. Bul másele Prezıdent deńgeıine deıin shyǵarylady. Alaıda ol naqty salaǵa baılanysty bolǵannan keıin taza Ulttyq banktiń quziretine berilýi kerek. Biz arnaıy valıýtalyq rejımdi engizýdi Ulttyq bankke berýdi usynyp otyrmyz. Alaıda bank aldymen Úkimetpen keńesip alýy shart. Sebebi arnaıy valıýtalyq rejım tikeleı ekonomıkaǵa áser etip otyr», - deıdi ádilet vıse-mınıstri Záýresh Baımoldına.
Onyń aıtýynsha, ázirshe Ulttyq bank atalǵan mindetti óz moınyna alýǵa kelispeı otyr.
Aıta keteıik, búgin ádilet mınıstrliginde bılik tarmaqtary arasynda ókilettilikterdi qaıta bólý máselelerin talqylaýǵa arnalǵan qoǵamdyq tyńdaýlar ótken bolatyn.
Vıse-mınıstr Záýresh Baımoldınanyń aıtýynsha, naýryzdyń 15-sine deıin atalǵan eki zań jobasyn Parlamenttiń qaraýyna engizý kózdelip otyr. Qujattardyń tolyq ataýy - "QR keıbir zańnamalyq aktilerine memlekettik bıliktiń tarmaqtary arasynda ókilettilikterdi qaıta bólý máseleleri boıynsha ózgerister men tolyqtyrýlar engizý týraly" zań jobasynyń tujyrymdamasy jáne "QR keıbir konstıtýsııalyq zańdaryna memlekettik bıliktiń tarmaqtary arasynda ókilettilikterdi qaıta bólý máseleleri boıynsha ózgerister men tolyqtyrýlar engizý týraly" zań jobasynyń tujyrymdamasy. Atalǵan eki qujatty da ádilet mınıstrligi ázirlep otyr. Buǵan deıin ótken zań jobalaý qyzmeti máseleleri jónindegi vedomstvoaralyq komıssııanyń kezekti otyrysynda Baımoldına hanym bılik ókilettilikterin qaıta bólgennen keıin Úkimet músheleriniń jaýapkershiligi qalaısha ózgeretini jaıynda aıtyp bergen.