23 aqpan kúni Qyzylordada Eýropa qaıta qurý jáne damý banki men Qyzylorda oblysynyń ákimdigi arasyndaǵy áriptestik máselelerine arnalǵan jıyn ótti.
Oǵan EQDB-nyń Qazaqstan boıynsha dırektory Djanet Hekman men ınfraqurylym jónindegi bıznes-toptardyń atqarýshy dırektory Tomas Maıer qatysty. Qyzylorda oblysynyń ákimi Qyrymbek Kósherbaev Eýropa Qaıta qurý jáne Damý Banki Prezıdentine, QR Prezıdenti janyndaǵy sheteldik ınvestorlar keńesiniń teń tóraǵasy Sýma Chakrobartı myrzaǵa jáne aımaq úshin mańyzdy ınfraqurylymdyq jobalardy iske asyrýǵa qoldaý kórsetkeni úshin banktiń ózge de ókilderine alǵysyn bildirdi.
"Eýropa Qaıta qurý jáne Damý Bankiniń qoldaýymen oblystyń ınfraqurylymyn damytý máseleleri boıynsha birinshi kezektegi aýqymdy sharýalar atqarylýda. Jalpy somasy 121 mln. AQSh dollaryn quraıtyn 5 nesıelik kelisim jasaldy (40,2 mlrd teńge). Jalpy alǵanda 400 mln AQSh dollaryna teń (133 mlrd teńge) 9 jobany birlesip júzege asyrý týraly kelisim jasaldy", - dedi oblys ákimi.
Qyrymbek Kósherbaev Eýropa Qaıta qurý jáne Damý Bankiniń Qazaqstan boıynsha dırektory Djanet Hekmannyń eńbegin erekshe atap ótip, ony Qyzylorda oblysynyń Qurmet gramotasymen marapattady. О́z kezeginde Djanet Hekman hanym aımaq basshylyǵyna jemisti áriptestik úshin alǵysyn bildirip, jýyrda Kaırge (Egıpet) qonys aýdaratynyn aıtty. "Búgin Qyzylorda áýejaıyna tabanym tıgen sátte osydan 4 jyl buryn kelgen kezim esime tústi. Qyzylordaǵa ár kelgen saıyn oń ózgeristerdi kóremin: jańa joldar, zamanaýı avtobýstar, mektepter men aýrýhanalar. Qyzylorda oblysy Eýropa Qaıta qurý jáne Damý Bankimen birlesken jobalardy júzege asyrýda ózge óńirlerge úlgi bolyp otyrǵan birden-bir aımaq", -dedi Hekman.