Sapporodaǵy sátti kún eki altyn, eki kúmis jáne bir qola syılady

Sapporodaǵy Aq Azıadanyń altynshy kúni Qazaqstan úshin oljaly boldy. Bul kúni qorjynymyzǵa eki altyn, eki kúmis jáne bir qola medal tústi. Sátimen bolǵan bul iske bıatlonshylarymyz súbeli úles qosty. On shaqyrymdyq sprınterlik qashyqtyqta baq synaǵan Iаn Savıskıı jelden júırik shańǵyshy ǵana emes, quralaıdy kózge atqan mergen de ekendigin dáleldedi. Ol bul belesti 26 mınýt 59,2 sekýndta baǵyndyrdy. Máre syzyǵyn ekinshi bolyp qıǵan taǵy bir jerlesimiz Vasılıı Podkorytov nysana atýda eki ret múlt ketip, sý jańa chempıonnan 15 sekýndqa qalyp keldi. Qola júldege japondyq bıatlonshy Mıkıto Tachızakı (+20,2; bir ret múlt ketti) qol jetkizdi. Azıada chempıony Iаn Savıskıı Shyǵys Qazaqstan oblysynyń ókili. Jasy bıyl otyzǵa tolatyn tájirıbeli sportshy. Vankýver-2010 Olımpıadasynyń qatysýshysy. 2011 jylǵy Azııa oıyndarynyń chempıony (4h7,5 km estafetasy), 2014 jyly Almatyda ótken Azııa chempıonatynyń jeńimpazy (15 km mass-start). Sapporodaǵy úshinshi altynnyń ıegeri kóshbasshy bıatlonshymyz Galına Vısh­nevskaıa boldy. Qyzdar arasyndaǵy sprın­terlik synda sańlaq sportshy 20:32.6 mınýt kórsetkishpen jeńis tuǵyrynyń eń bıik satysyna kóterildi. Jarys jolyna Galı­namen tize qosyp shyqqan taǵy bir bıat­lonshymyz Alına Raıkova (+50.6) qura­manyń qorjynyna qola júlde saldy. Al bul syndaǵy kúmis medal qytaılyq bıatlonshy Iаn Janǵa (+24.2) buıyrdy. Eske salar bolsaq, Shyǵys Qazaqstan oblysy­nyń 23 jastaǵy ókili Galına Vıshnevskaıa taıaýda ǵana Almatyda ótken XXVIII Dúnıejúzilik qysqy Ýnı­versıada dodasynda eki altyn, úsh kúmis medal­dy jeńip alǵan bolatyn. Sondaı-aq, altynshy jarys kúninde shańǵyshy Elena Kolomına da erledi. Ol bes shaqyrymdyq qashyqtyqty 15:02.8 mınýtta júgirip ótip, kúmis júldege ıe boldy. Bul básekede Elenadan 6.7 sekýndqa ozyp ketken japon qyzy Iýkı Kabaıashı chempıon atandy. Kolomına budan buryn 1,4 shaqyrym­dyq qysqa qashyqtyqta kúmis jáne 10 shaqy­rymdyq jarysta qola júlde alǵan bolatyn. Sonymen, qysqy Azııa oıyndaryndaǵy alty kúnde alǵan júldelerimizdiń sany 12-ge jetti. Iаǵnı, 3 al­tyn, 4 kúmis jáne 5 qola medal­men jal­py­ko­mandalyq esepte tórtinshi orynda kelemiz. Kósh basynda qorjynynda 45 medali (14 altyn, 15 kúmis, 16 qola) bar Japonııa keledi. Ekinshi oryndaǵy Ońtústik Koreıanyń enshisinde 34 júlde (14, 12, 9) bar. Al ázirge úshinshi satyǵa taban tiregen Qytaı quramasy 18 (6, 6, 6) medal alyp úlgerdi. Qaırat ÁBILDINOV, «Egemen Qazaqstan» Sýretterdi túsirgen Danııar MAILYBAEV