Medısınalyq saqtandyrýdyń maqsaty qandaı?

Keshe Úkimette «Ult saýlyǵy – memleket básekelestiginiń kepili» taqy­rybynda baspasóz máslıhaty ótti. Jıynǵa Densaýlyq saqtaý mınıstri Eljan Birtanov, Medısınalyq jáne farmasevtıkalyq qyzmetti baqylaý komıteti tóraǵasynyń orynbasary Larısa Pak, «Áleýmettik medısınalyq saqtandyrý qory» kommersııalyq emes aksıonerlik qoǵamynyń tóraıymy Elena Bahmýtova, Respýblıkalyq elektrondy densaýlyq saqtaý orta­ly­ǵynyń bas dırektory Oljas Ábishev qatysty. Densaýlyq saqtaý mınıstri Eljan Birtanov óz sózinde Elbasynyń «Qazaq­stannyń Úshinshi jańǵyrýy: jahan­dyq básekege qabilettilik» atty halyq­qa Jol­daýynda densaýlyq saqtaý júıe­siniń aldyna mindetti áleýmettik medı­sı­nalyq saqtandyrýdy (MÁMS) en­gizý, jeke medısınalyq uıymdarǵa saq­tan­dyrý júıesinde teń jaǵdaı jasaý, densaýlyq saqtaý salasyn tıisti deńgeıde aqparattandyrý, barlyq dári-dármekterge baǵany memlekettik deńgeıde retteý týraly naqty tapsyrma bergenin atap ótti. «Bıyl aqpan aıynda medısınalyq qaýymdastyq, jumys berýshiler men halyq­tyń arasynda mindetti áleýmettik medı­sı­nalyq saqtandyrý júıesine baı­la­nysty aqp­arattyq-túsindirý jumys­tarynyń úshinshi kezeńi bastaldy. Bul sharany júrgizý úshin árbir oblysta, Almaty, Astana qalalarynda ákimder men olardyń orynbasarlarynyń basshy­lyǵymen aımaqtyq shtabtar jumys is­teýde. Aqparattyq-túsindirý jumys­taryna Respýblıkalyq shtab quramynyń belgili dárigerleri, qoǵam qaıratkerleri, medısınalyq oqý oryndarynyń oqytý­shylary, qurylymdyq bólimderdiń bas­shylary shaqyryldy. Jalpy alǵanda, MÁMS-ti engizý qazaqstandyqtardyń densaýlyǵyn jaqsartýǵa, ómir súrý uzaqtyǵyn arttyrýǵa, sapaly medısınalyq kómekti qoljetimdi jáne halyqtyń sura­nysyna saı etýge, ambýlatorlyq deń­geıde dárimen qamtamasyz etýdiń aıasyn keńeıtýge, densaýlyq saqtaý júıesindegi beıresmı tólemder kólemin azaıtýǵa múmkindik beredi», dedi mınıstr. Densaýlyq saqtaý mınıstrligi men Dúnıejúzilik bank sarapshylary 57 el­diń tájirıbesi eskerilgen zań jobasyn 3 jyl kóleminde daıyndap, tıimdi model usynǵandaryn aıtyp ótken bolatynbyz. Al atalmysh medısınalyq saqtandyrý qoryna tólem jasaý jóninen halyqtyń áli de kóp bóligi habarsyz. Osy tóńireginde «Áleýmettik medısınalyq saqtandyrý qory» AQ tóraǵasy Elena Bahmýtova medısınalyq saqtandyrý qoryna tólem jasaýshylardyń jyldyq qarajatyn tilge tıek etti. «Jalpy alǵanda, jumys berýshi jylyna bir qyzmetkerge 30 550 teńge tólese, qyzmetkerdiń ózi 20 470 teń­ge kóleminde, jeke kásipker 35 560 teń­ge jáne jumyssyz top 17 818 teńge, al mem­leket zeınetkerler men múgedekterge, ózge de áleýmettik jeńildigi bar jandar úshin 71 160 teńge tóleıtin bolady», dedi ol. Jıynǵa qatysýshylar kezeń-kezeń­men pasıentterdiń medısınalyq qyzmetkerlerge ózdiginen onlaın jazy­lý, onlaın tártipte elektrondy den­saý­lyq pasportynda jınaqtalǵan tehno­logııasynyń kómegimen pasıent­terge keńes berý men olardy baqylaý engiziletinin al­ǵa tartty. Raýan QAIDAR, «Egemen Qazaqstan»