Mámileger keńesterdiń mańyzy zor

Ulttyq mýzeıde Qazaqstan halqy Assambleıasynyń uıymdastyrýymen «Qoǵamdyq kelisimdi qamtamasyz etýdegi medıasııa ınstıtýtynyń róli» atty halyqaralyq dıspýt-forým ótti. Alqaly jıynǵa QHA Tóraǵanyń oryn­basary – Hatshylyq meńgerýshisi Eraly Toǵjanov, QHA medıasııa keńesiniń tór­aǵasy, Parlament Májilisiniń depýtaty Baqyt­jan Ábdiraıym, Reseı Federasııasy Ulttyq medıatorlar uıymynyń prezıdenti Sısana Shamlıkashvılı, Qazaqstan Sýdıalar odaǵynyń tóraǵasy Musabek Álimbekov, sonymen qatar, elimizdegi Dostyq úıleri medıasııa kabınetteriniń meńgerýshileri, kásibı medıatorlar qatysty. Forým barysynda elimizdegi bitim­destirý ınstıtýttarynyń jaı-kúıi men olardy damytý máseleleri talqylandy. Qatysýshylar medıasııanyń sot júıesindegi róli, sot organdarynyń medıasııalyq qury­lymdarmen ózara jumysy týraly oı bólisip, pikir almasty. E.Toǵjanov atap ótkendeı, qoǵamdyq kelisim birtutas eldiń, memlekettiń jáne azamattyq qoǵamnyń barlyq ınstı­týt­tarynyń basty qaǵıdasy bolýǵa tıis. Áleýmettik jáne quqyqtyq janjaldar­dyń aldyn alý men sheshýdiń naqty tetik­terin paı­dalanýdyń qoǵamdyq kelisimdi qalyp­tastyrýdaǵy róli óte zor. Qoǵamda týyn­daǵan daý-damaılardy sotqa deıingi sheshýde ózara bitimge kelýdiń basty sharty – medıasııa rásimderi. – Qazaqstanda daýlardy sheshýde, quqyqtyq saýatsyzdyqpen kúresýde, aza­mat­tardyń quqyqtyq sanasyn damytýda ár azamat úshin mańyzdy máselelerdi sot jáne ákimshilik organdarynyń qatysýynsyz sheshý múmkindigin berýge medıasııa aıtar­lyqtaı yqpal etedi. Medıasııa rásimi Qazaqstan halqynyń qoǵamdyq kelisimin qamtamasyz etý boıynsha zamanaýı úderis­terdiń ajyramas bóligi bolyp tabylady, – dedi E.Toǵjanov. Qoǵamdaǵy tynyshtyqty saqtaý – ot­ba­syndaǵy tynyshtyqtan bastalady degen qaǵıda bar. О́kinishke qaraı, elimizde jas otbasylarda urys-keris kóbeıip, ajyrasý kórsetkishi artyp barady. Respýblıkalyq Dostyq úıi medıasııa kabınetiniń meń­gerýshisi Nursáýle Ábdiqadyrqyzynyń aıtýynsha, kásibı mámilegerlerdiń qyzmetine júginetinderdiń basym bóligi otbasyndaǵy janjalǵa qatysty sheshim izdegen jandar eken. Eńbek daýyna baılanysty tórelik izdegenderdiń de qatary kóp. Jıynnyń qorytyndysynda elimizde medıasııany damytý boıynsha naqty usynystar ázirlendi. Arnur ASQAR, «Egemen Qazaqstan»