Syrtqy ister mınıstrliginde Qazaqstannyń Malaızııadaǵy Tótenshe jáne ókiletti elshisi Danııar Sárekenovtiń qatysýymen jýrnalısterge arnalǵan brıfıng ótti. Eki el arasyndaǵy dıplomatııalyq qarym-qatynas ornaýynyń 25 jyldyǵyna oraı uıymdastyrylǵan shara aıasynda saıası-ekonomıkalyq áriptestiktiń jaı-kúıi baıandaldy.
Elshiniń aıtýynsha, Qazaqstan men Malaızııa – bir-birinen qashyq ornalasqan elder. Sondyqtan alys-beris pen barys-kelistiń kórsetkishteri keremet dep aıtýǵa kelmeıdi. Degenmen, aýyzdy qur shóppen súrtýge de bolmaıdy eken. «О́tken jyly eki el arasyndaǵy saýda aınalymy 300 mln AQSh dollary shamasynda bolsa, onyń 155,7 mln-yn eksport, 138,69 mln dollaryn ımport quraǵan. Al bizdiń elden qara metall ónimderi men odan jasalǵan buıymdar, geodezıkalyq jáne ólsheý quraldary, túrli ólshemdi qubyrlarǵa arnalǵan fıtıngiler shyǵarylsa, Malaızııadan keletin taýarlardyń ishinde jeńil ónerkásip ónimderi men elektronıka, qural-saımandar men bólshek buıymdar bar. EKSPO kórmesi arqyly álem elderin «jasyl ekonomıkaǵa» kóshýdi usynǵan Qazaqstannyń bastamasyn qoldaıtyn Malaızııa sońǵy úlgidegi tehnologııalyq tájirıbelerimen de bólisýge daıyn ári osy baǵytta ózara yntymaqtastyq ornaǵan», – dedi D.Sárekenov.
Shırek ǵasyr ishinde Qazaqstan men Malaızııa arasynda mádenı-gýmanıtarlyq áriptestik te ornap úlgergen. Ásirese, Qazaqstan-Malaızııa birlesken jumys toby qurylýynyń nátıjesinde búgingi tańda Malaızııada 1,5 myńǵa jýyq stýdent túrli sala boıynsha bilim alýda. Sondaı-aq, 2012 jyldan beri atalǵan elde Qazaq ádebı ortalyǵy da jumys isteıtindigin qaperlerińizge sala keteıik.
Brıfıng barysynda elshi aıryqsha atap ótken derektiń biri – ınvestısııalyq saıasat pen ǵylymı-tehnıkalyq jáne ınnovasııalyq baǵyttaǵy baılanystardyń da nyǵaıyp kele jatqany boldy. Búgingi tańda elimizdiń aýyl sharýashylyǵy men qurylys salasy jáne munaı-gaz jobalaryn júzege asyrý boıynsha kóptegen malaızııalyq birlesken kompanııalar qyzmet kórsetedi. Olar ótken jyldyń ózinde Qazaqstanǵa ınvestısııa retinde aıtarlyqtaı qarjy quıǵan bolsa, sonyń ishinde sony tehnologııalar men ınnovasııalyq jańashyldyqtardyń óndiriske engizilýine basymdyqtar berilipti.
Nurlybek DOSYBAI,
«Egemen Qazaqstan»