QR Aqparat jáne kommýnıkasııalar mınıstrligi Úkimetke «Sıfrlyq Qazaqstan» baǵdarlamasynyń jobasyn mamyr aıynda engizedi. Bul týraly Úkimet úıinde ótken baspasóz máslıhatynda atalǵan vedomstvo basshysy Dáýren Abaev málimdedi.
"Elbasy Úkimetke «Sıfrlyq Qazaqstan» baǵdarlamasyn qabyldaýdy tapsyrǵanyn bilesizder. Osy arqyly sıfrlyq ındýstrııany, IT salany damytý máseleleri jolǵa qoıylýy kerek. Aqparat jáne kommýnıkasııalar mınıstrligi búgingi kúni bul baǵytta úlken jumystar atqarýda. Atap aıtqanda, memlekettik baǵdarlamanyń jobasyn Úkimetke osy jyldyń mamyr aıynda engizýdi josparlap otyrmyz",-dedi D. Abaev.
Budan bólek, mınıstr vedomstvo 1 300-ge jýyq aýyldy optıkalyq-talshyqty jelimen qamtamasyz etý jobasyn júzege asyrýǵa kiriskenin jetkizdi. Osy oraıda 2 mıllıonnan astam adam keń jolaqty ınternetke qol jetkizetin bolady. Atalǵan joba memlekettik-jekemenshik seriktestik aıasynda qamtylady.