Qazaqstandyq kásipqoı boksshy qyz Fırýza Sháripova aldaǵy josparynyń kúrt ózgerýine baılanysty fılmderge túsýden bas tartqanyn málimdedi. Bul týraly allfight.ru habarlady.
Alǵashynda Sháripovanyń tıtýldy jekpe-jek ótkizetini habarlanǵan.
«Tıtýldy aıqas úshin biraz qarjy kerek boldy. Al biz ázirge demeýshi taba almadyq. Onyń ústine bapkerim de aýysty. Ol kisi de meniń sharshy alańdaǵy kúshimdi baıqap kórgisi keledi. Sol úshin biz reıtıngti urys ótkizý jón dep sanadyq», – deıdi boksshy qyz.
Fırýzanyń bul jolǵy qarsylasy da kásipqoı rıngke jańadan kelgen boksshy. «Qazirgi ýaqytta qarsylas tabý ońaı sharýa emes. Kóbisi bas tartady nemese qomaqty qarjy suraıdy. Debıýtant degende tájirıbesi az eken dep oılamaǵan jón. Iýlııa Chernoborodova úlken týrnırlerde top jarǵan myqty boksshy. Kásipqoı boksqa alǵash ret shyǵaıyn dep turǵandyqtan alty raýndtan uzaı almaımyz», – dedi Sháripova.
«Sońǵy kúnderi josparymyz kúrt ózgerip ketti. Qazaqstannan, Reseıden túrli kınolarǵa, baǵdarlamalarǵa túsý jóninde usynystar túsken. Jaqynda Gollıvýdtyń rejısserlerimen tanysý úshin ári kastıngterge qatysý úshin Amerıkaǵa jol júrmek bolǵanbyz. Men túsetin «Igra prestolov» fılmi de bolǵan. Biraq bárinen bas tartýǵa májbúr boldyq. Sebebi, boks men úshin birinshi orynda. Chempıondyq jekpe-jegime deıin jeke sharýama ýaqytym bolmaıdy», – dedi qazaqstandyq boksshy qyz.
«Iýlııa Chernoborodovaǵa qarsy aıqasym álem chempıondyǵy úshin ótetin urysyma deıingi daıyndyq bolmaq. Al odan keıin sáýir aıynda Máskeýdegi «Boks akademııasynda» taǵy da rıngke shyǵýdy josparlap otyrmyz. Ol tıtýldy jekpe-jek bolýy tıis. Josparymyzdyń bárin qarjy máselesi ustap tur. Osy is sheshilgennen keıin tájirıbesi kóp, chempıon qyzdardyń birin jekpe-jekke shaqyramyz. Qazirdiń ózinde álemdegi jetekshi uıymdardyń birinen reıtıngi joǵary boksshylardyń birimen tıtýldy urys ótkizý jóninde aldyn ala ruqsatyn aldyq», – dedi boksshy qyz.
«O basta bir kompanııamen demeýshilik maqsatynda kelisimshartqa qol qoıǵanbyz. Biraq olar óz mindetin oryndaýdan bas tartty. Odan bólek kóptegen mekemeler qarjylaı kómektesetinderin aıtqan. Biraq bári sózben ǵana shekteldi. Qazir komandam demeýshiler izdeýmen aınalysyp jatyr», – dedi Fırýza Sháripova.
Aıta keteıik, Fırýza Sháripova 4 naýryz kúni Iýlııa Chernoborodovamen judyryqtasady.