Qazaqstan Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa men Qazaqstan Prezıdenti janyndaǵy Memlekettik basqarý akademııasy, sondaı-aq, Qazaqstandaǵy BUU Damý baǵdarlamasy elimizde otbasylyq jáne genderlik saıasatty iske asyrýda jańa ádisterdi qalyptastyrý máselesi boıynsha halyqaralyq ǵylymı-tájirıbelik konferensııa ótkizdi.
Jıyndy Ulttyq komıssııa tóraıymynyń orynbasary Elena Tarasenko ashyp, máseleniń mańyzdylyǵyna basa nazar aýdardy. «О́tken jyldyń 6 jeltoqsanynda Memleket basshysynyń Jarlyǵymen elimizde 2030 jylǵa deıingi otbasylyq jáne genderlik saıasat tujyrymdamasy bekidi. Qazirgi tańda atalǵan Tujyrymdamany júzege asyrý úshin 2017-2019 jyldarǵa arnalǵan is-sharalar jospary boıynsha aýqymdy jumystar atqarylyp keledi», – dedi komıssııa tóraıymynyń orynbasary. Sondaı-aq, ol Tujyrymdamadaǵy máseleler «Qazaqstan-2050» Strategııasynda, «100 naqty qadam» Ult josparynda kózdelgen maqsat-mindettermen qatar júretinin aıta kele, onda Ekonomıkalyq yntymaqtastyq jáne damý uıymynyń, BUU Áıelderge qatysty barlyq kemsitýshilikti joıý komıtetiniń usynymdary eskerilgenine toqtaldy.
Qazaqstandaǵy BUU Damý baǵdarlamasy Turaqty ókiliniń orynbasary Mýnhtýıa Altangerel BUU Damý baǵdarlamasy Astana ekonomıkalyq forýmy aıasynda kóp jyldan beri Qazaqstan Prezıdenti janyndaǵy Memlekettik basqarý akademııasymen áriptestik ornatyp keletinin, onyń ishinde memlekettik qyzmet júıesin halyqaralyq standartqa saı etý máselesine mán beriletinin jetkizdi. «Shyn máninde de, bul Tujyrymdamanyń róli zor. Onyń tájirıbe júzinde iske asyrylýy úshin jańa ınnovasııalyq ádis-tásilderdi oılastyryp, sol arqyly adam kapıtalynyń damýyna, memleket turaqtylyǵyn qamtamasyz etýge, otbasy qundylyqtarynyń saqtalýyna jáne otbasynyń áleýmettik jaǵynan qorǵalýyna aıtarlyqtaı deńgeıde áser etýge bolady. Eger genderlik saıasat durys júrgizilmese, onda memlekettiń de alǵa qaraı ilgerileı qoıýy neǵaıbyl. Demek, názik jandylar qoǵamdaǵy árbir salaǵa belsene aralasyp, óz úlesterin qosýlaryna bolady. BUU Damý baǵdarlamasynyń osy máselege qatysty alǵa qoıǵan mindetteriniń negizgi ózegi mine, osyndaı oı-tujyrymǵa saıady», – dedi M.Altangerel.
Qazaqstan Respýblıkasy janyndaǵy Memlekettik basqarý akademııasynyń vıse-rektory Aıgúl Kósherbaeva akademııanyń ǵalymdary 2013 jyldan beri genderlik saıasatty júzege asyrý boıynsha belsendi túrde jumys atqaryp kele jatqanyn tilge tıek etti. «Biz túrli sıpattaǵy trenıngter men semınarlardy uıymdastyryp júrmiz, olardyń deni genderlik saıasatty túsiný mádenıetin arttyrýǵa baǵyttalǵan. Al bul – óte mańyzdy másele», – dedi A.Kósherbaeva.
Konferensııaǵa qatysýshylar, sondaı-aq, «Tujyrymdamany jańǵyrtý jáne ekonomıkalyq ósýdiń jańa modelin qurý fılosofııasy», «Adam áleýetin damytýdaǵy otbasynyń róli», «Turmystyq zorlyq-zombylyqtyń aldyn alýdaǵy jáne onymen kúresýdegi ınnovasııalyq tásil: genderlik ólshem», «Ulttyq otbasylyq jáne genderlik saıasat – adam kapıtalyn damytýdaǵy zamanaýı úrdis» syndy taqyryptar boıynsha sóz sóıledi.
Láıla EDILQYZY, «Egemen Qazaqstan»