Derek boıynsha, ótken jylǵy ekonomıkalyq ósimge qurylys sektory – 2,6 paıyz, kólik jáne logıstıka salasy – 3,8 paıyz jáne aýylsharýashylyq salasy 5,5 paıyz úles qosqan. Sondaı-aq, ınvestısııalyq belsendilik te oń yqpal etipti. Negizgi kapıtalǵa salynǵan ınvestısııa kólemi 5,1 paıyzǵa ósip, 7,7 trln teńgeni quraǵan. Baǵany turaqtandyrýǵa qatysty qabyldanǵan sharalar nátıjesinde jyldyq ınflıasııa 8,5 paıyz shamasynda saqtalǵan. Bul týraly Ulttyq ekonomıka mınıstrliginiń qorytyndy esebinde aıtyldy.
Mamandar pikirinshe, byltyr ekonomıkanyń ishki jáne syrtqy jaǵdaılarǵa beıimdelýi qıyn bolǵan kórinedi. Energııa resýrstarynyń baǵasy qubylmaly jáne tutynýshylyq belsendiliktiń tómendeýine qaramastan, daǵdarysqa qarsy sharalar men «Nurly jol» memlekettik baǵdarlamasy 2016 jyly 1 paıyz IJО́ ósimin qamtamasyz etken.
Ulttyq ekonomıka mınıstri Tımýr Súleımenov aǵymdaǵy jyly ishki jáne syrtqy jaǵdaılardyń birtindep ońalýyna baılanysty ekonomıkanyń keıbir salalaryna qatysty kórsetkishterdi qaıta qaraý josparlanyp otyrǵanyn aıtady. «Negizgi basym baǵyttar – munaı óndirisin Qashaǵan arqyly 79,5-ten 81 mln tonnaǵa deıin ulǵaıtý; ónerkásipte qaıta óńdeý salasyn IIDMB jobalary jáne «Nuly jol» baǵdarlamasyn jalǵastyrý arqyly qaıta óńdeýdi 1,2 paıyzdan 2,6 paıyzǵa ulǵaıtý; «Nurly jol» memlekettik baǵdarlamasy arqyly eldiń tranzıttik áleýetiniń 4 paıyzǵa ósýin qamtamasyz etý mańyzdy», dedi ol. Atalǵan faktorlar ekonomıkanyń damý qarqynyn arttyrady jáne bıylǵy IJО́ ósimin 2 paıyzdan kem túsirmek emes.
Bıyl ekonomıkada oń ózgerister, jumyspen qamtý arqyly eldegi áleýmettik turaqtylyqty qamtamasyz etý, halyqtyń tabys tabýyna jaǵdaı jasaý, ekonomıkalyq ósimdi yntalandyrý jumystary jalǵasady. «Bıznestiń shyǵyndaryn qysqartý, onyń ishinde energetıka, kólik, logıstıka jáne TÚKSh boıynsha keshendi jumys atqarý josparlanǵan. Sondaı-aq, básekelestikke kedergi keltiretin zańnama tolyq tekserilip, olqylyqtar anyqtaldy», dep atap kórsetti T.Súleımenov.
Ashat RAIQUL,
«Egemen Qazaqstan»