Qostanaı oblysynyń Amangeldi aýdanynyń turǵyndary dabyl qaǵýda. Aıtýlarynsha, sharanasyn jaryp shyqqan qulyndar sál sátte ólip jatqan kórinedi. Bul týraly abctv.kz jazyp otyr.
Aýdan turǵyny Súndet Esentaevtyń aıtýynsha, qulyndar týǵan boıda ólip jatqan kórinedi.
«Qazirdiń ózinde 23 bas qulyn óldi. Týǵan boıda ólip qalady. Sebebin bilmeı dalmyz. Byltyr Torǵaıda aqbókender qyryldy, bálkim qulyndardyń ólimine bir baılanysy bar shyǵar. Bul jaǵdaı jalpy aýdan boıynsha oryn alyp otyr», – deıdi ol.
Oǵan dálel retinde adamdar beınejazbany da kórsetýde. Olar kómek surap otyr.
Qostanaı oblysynyń veterınarııa basqarmasyndaǵylar jaǵdaıdan habardar ekenderin, biraq jappaı qyrylý oryn alyp otyrmaǵanyn aıtady.
«Bıeler qulyn tastap jatyr. Onyń sebebi ázirshe belgisiz. Adamdar bizge habarlady. Biz ol jaqqa mamandardy jónelttik. Olar eki bıeniń qulyn tastaǵanyn aıtty. Mamandar ólgen tólden synama alyp, taldaý jasaýǵa jóneltti. Ázirshe nátıjesi belgisiz. Eger jappaı qyrylatyn bolsa, onda sol jaqqa mamandarymyzdy jiberemiz», – dep málim etti oblystyq veterınarııa basqarmasy basshysynyń orynbasary Marat Kúzenbaev.
Qadaǵalaýshy mekemeniń aıtýynsha, másele baqylaýǵa alynǵan.