Prezıdent janyndaǵy Memlekettik basqarý akademııasynda Qazaqstan halqy Assambleıasynyń qoldaýymen «Qoǵamdyq kelisim men jalpyulttyq birlik salasyndaǵy memlekettik saıasat: damýdyń jańa kezeńiniń mindetteri» taqyrybynda respýblıkalyq semınar-trenıng bastaldy.
Úsh kúnge sozylatyn shara Elbasynyń «Qazaqstannyń Úshinshi jańǵyrýy: jahandyq básekege qabilettilik» Joldaýyn iske asyrý sheńberinde uıymdastyrylyp otyr.
Semınar-trenıng barysynda Prezıdent Ákimshiliginiń, QHA Hatshylyǵynyń, Memlekettik qyzmet jáne sybaılas jemqorlyqqa qarsy is-qımyl agenttiginiń, Din isteri jáne azamattyq qoǵam mınıstrliginiń, Eńbek jáne halyqty áleýmettik qorǵaý mınıstrliginiń, Ortalyq saılaý komıssııasynyń mamandary, Astana medısınalyq ýnıversıtetiniń professorlary dáris oqymaq.
Sharaǵa elimizdegi etnomádenı birlestikterdiń ókilderi, din isteri, tilderdi damytý basqarmalarynyń mamandary, quqyq qorǵaý organdarynyń mamandary, QHA-nyń óńirlerdegi hatshylyqtarynyń jetekshileri, etnos-
taralyq jáne konfessııaaralyq qatynastar, qoǵamdyq kelisim men jalpyulttyq birlik salasynda qyzmet atqaratyn memlekettik qyzmetshiler qatysyp, dáris tyńdaıdy.
– Jalpy, etnosaralyq jáne konfessııaaralyq qatynastarǵa qatysty saıasatty júrgizýde memqyzmetkerlerdiń bilimi men biliktiligine kóp nárse baılanysty. Osy semınar-trenıngte dáris tyńdaǵan mamandardyń kásibı biliktiligi artady dep úmittenemiz. Úsh kún ishinde elimizdiń óńirlerindegi etnosaralyq ahýal, kóshi-qon úderisteriniń negizgi baǵyttary men onyń turaqtylyqqa tıgizetin yqpaly syndy taqyryptar boıynsha dáris oqylady. Elimizdegi dinı ahýaldyń búgingi jaǵdaıy men bolashaǵyna sholý jasalady. Úshinshi jańǵyrý boıynsha ekonomıkalyq ósimniń jańa úlgisine taldaý jasalady, – dedi Memlekettik basqarý akademııasynyń sharany uıymdastyrýshy mamany.
Semınar-trenıng qorytyndysy boıynsha oǵan qatysqan mamandarǵa tıisti sertıfıkattar tapsyrylady.
Arnur ASQAR,
«Egemen Qazaqstan»