Qysqy sportty súıgen qaýymdy qýanyshqa bólegen XXVIII Dúnıejúzilik qysqy Ýnıversıadanyń sporttyq keshenderi endi kimge qyzmet etpek? Han saraıyndaı «Halyk Arena» men «Almaty Arena» sport nysandary mamandardyń aıtýynsha, keleshekte qala turǵyndarynyń sporttyń qalaǵan túrlerimen aınalysýyna qyzmet etýge saqadaı-saı eken.
Mysaly, «Almaty Arena» saraıy 12 myń adamǵa dep eseptelingen bolsa, «Halyk Arena» ǵımaratynda 3 myń adam emin-erkin otyra alady. Al, Atletter aýyly 5 myń adamǵa esigin aıqara ashqan bolatyn.
«Ýnıversıada murasy» atty jańa jobanyń aıasynda Atletter aýylyndaǵy 140 myńnan asa turmystyq zattar men arnaıy tehnıkalyq qondyrǵylar Almaty shaharyndaǵy 500-ge tarta áleýmettik mekemelerge taratyldy. Bul da qala ómirindegi ıgiligi zor saýapty istiń biri bolǵany sózsiz. Medısınalyq qondyrǵylar men keńse tehnıkalary qalalyq aýrýhanalarǵa, mektepterge, emhanalarǵa, balabaqshalarǵa, sport mektepterine, jataqhanalarǵa jáne ardagerler úılerine jetkizilip berildi. Mine, kóptiń kóńilinde júrgen bul másele de óz sheshimin ornymen tapty.
Sonymen qatar, Atletter aýylyndaǵy páterler «Ýnıver-sıada murasy» jobasy aıasynda shahardaǵy jyldar boıy úı alýǵa kezekte turǵan muqtaj jandarǵa retimen bólinip beriletin bolady. Osyndaı halyq úshin jasalynǵan ıgi jaqsylyqtar memlekettegi syndarly saıasattyń arqasynda iske asyp otyr.
Al, endi Ýnıversıadaǵa arnalyp salynǵan sport saraılary jaıly tarqata aıta keteıik. Záýlim sport keshenderiniń ishi jarys ótkennen keıin qańyrap bas qalmasy beseneden belgili. Al, sol ǵımarattardyń ishin sportqumar halyqqa toltyrý úshin jattyǵý baǵasyn aspandatpaı, qalta kóteretindeı etip qoısa ǵana buqara halyqtyń sportqa degen yntasy arta túseri haq.
Ýnıversıada-2017 dıreksııasy basshysynyń orynbasary Dıdar Saǵadıevtiń málimdeýinshe, atalǵan sport keshenderiniń barlyǵy derlik qarapaıym halyqtyń ıgiligine jumys isteıtin bolady. Dıdar Saǵadıev qysqy sport túrleriniń úıirmelerine balalaryn bergisi kelgen ata-analarǵa sport keshenderiniń esigi qashanda ashyq ekenin, jattyǵam deýshilerge qoıylatyn baǵa da qoljetimdi bolatynyn atap ótti.
Ýnıversıada aıaqtalǵannan keıin qala turǵyndarynyń qysqy sport túrlerine degen qyzyǵýshylyǵynyń arta túskeni baıqalady. Mysaly, mánerlep syrǵanaýdan Denıs Ten, Aıza Imambek, frıstaıldan Janbota Aldabergenova, Iýlııa Galysheva, Dmıtrıı Reıherd, short-trekten Abzal Ájiǵalıev bastaǵan qarakóz júırikterimiz, bıatlonnan Galına Vıshnevskaıa, Alına Raıkova syndy altyn júldeli sańlaqtarymyzdyń jarqyn jeńisteri bul sport túrlerine degen súıispenshiliktiń artýyna serpin beredi dep oılaımyz.
Ibn Sına «Dene shynyqtyrý jattyǵýlarymen aınalyssań, dárige pysqyryp ta qaramaısyń», degen eken. Densaýlyǵyn qadaǵalap, sportpen aınalysyp júrgen adamǵa aýrý da jolamaıdy. Adamnyń baqytty bolýynyń onnan toǵyzy osy densaýlyqqa baılanysty ekeni taǵy ras.
Olaı bolsa, denimiz saý, tánimiz sergek bolsyn desek, osy bir el ıgiligi úshin salynǵan ǵalamat sport saraılarynyń janynan aınalyp ótpeı, ishine bas suǵyp, bir ýaq densaýlyqqa kóńil bólgenimiz lázim bolar edi.
Aqyn ORDABAIULY,
jýrnalıst
ALMATY