Raıymbek aýdanyndaǵy kerege taýly Kegen óńirinde alty aı qys bolady. Qazan, qarasha aılarynda jaýǵan qar aqpannyń aıaǵyna deıin myzǵymaı jatady. Qurǵaq sary shunaq aıazda taý ózeni qatpaǵanymen ózge sýlar san qatparly muzǵa aınalady. Aıtalyq, keńes zamanynda Shyrǵanaq degen aýyldyń mańynan jýandyǵy balanyń belindeı qubyrmen jerasty sýy shyǵarylyp, alqaptar sýarylatyn. Ýaqyt óte kele sol qubyr qaraýsyz qalǵan-tyn. Sodan saqyldaǵan sary aıaz jer betine shyqqan sýdy qatparlaı qatyryp jýandyǵyna tórt-bes adamnyń qushaǵy jetpeıtin, bıiktigi 7, keı jyldary 10 metr bolatyn aısbergke aınaldyrady. Eki aýyldyń arasyndaǵy kúrejoldyń boıyndaǵy muztaý ispetti aısbergti alǵash kórgen adam mindetti túrde burylyp anyqtaı kórip, qolyn tıgizip Kegenniń keremetine tamsanatyny anyq. Áıteýir bir tartymdylyǵy bar.
Nurbol ÁLDIBAEV,
«Egemen Qazaqstan»
Almaty oblysy,
Raıymbek aýdany