Oblys ortalyǵyndaǵy Dostyq úıinde «Qoǵamdyq kelisim» birlestigi balqar, qarashaı-sherkes, qabardın halyqtarynyń deportasııasyna arnalǵan «Qazaq halqyna myń alǵys!» atty mádenı shara ótti. «Elbrýs» etnomádenı ortalyǵy» qoǵamdyq birlestigi uıymdastyrǵan jıynǵa qatysýshylar 1944 jyldyń naýryzynda Soltústik Kavkaz halqyn kúshtep qalaı elimizge jer aýdarǵany jaıly kınosıýjetter kórdi. – Men ol kezde 2-aq jasta ekenmin. Qazaq halqy jazyqsyzdan qańǵyrýǵa túsken halyqty rýhanı kúızelisten, kemsitýshilik pen ashtyqtan aman alyp qaldy ǵoı. Tólebaıdyń otbasynda 8 adam bolsa, áke-sheshem bar, 11 bala qosyldyq. Bir qazannan as ishtik. Qazaq aýyly – bizdiń ekinshi Otanymyz boldy. Qulaǵymyzda úlkenderden jıi estıtin Elbrýs degen bir-aq sóz júretin. Bizdiń ult ókilderi úshin osy sózdiń qudiretti ekenin eseıgen soń bildik qoı, – deıdi «Elbrýs» etnomádenı birlestiginiń tóraıymy Márııam Baıramqulova. Is-shara barysynda jergilikti Assambleıa tóraǵasynyń orynbasary S.Jetpisbaev, Qoǵamdyq kelisim keńesiniń tóraǵasy I.Ábdiqalyqov sóz sóılep, «Elbrýs» qoǵamdyq birlestiginiń mádenıetti, tildi, rýhanı qundylyqtardy jańǵyrtý boıynsha belsendi jumystary, sondaı-aq, dostyqty, beıbitshilikti, etnosaralyq kelisimdi nyǵaıtýdaǵy úlesteri úshin alǵys bildirdi. Al tatar-bashqurt aqsaqaldar keńesiniń tóraǵasy Mınır Galeev, «Vatan» ázerbaıjan aqsaqaldar keńesiniń tóraǵasy Djafar Mahmýdov, «Polonııa» polıaktar qoǵamynyń tóraǵasy Vıtalıı Svınsıskıı de ata-analary men týysqandarynyń qıyn taǵdyrlary jaıly aıtyp, qazaq halqyna alǵys bildirdi. Iá, ótkenniń aýyr oqıǵasy balqarlar men qarashaılardyń, basqa da ult ókilderiniń júreginde máńgi qaldy. Qazir óńirde balqarlar men qarashaılardyń tórtinshi urpaǵy turyp jatyr. Olar barlyq salalarda eńbek etip, qyzmet isteýde. – Men qazaq jigitine turmysqa shyqtym. Shúkir, qýǵyn-súrginge ushyraǵan ult ókilderiniń de tynysy keńeıip, urpaq jalǵasty. Aýylda turǵan kezden qazaq tilinde sóılep óstik. Birlestiktegi «Jańǵyrtý mektebinde» ul-qyzdarymyz balqar, qazaq tilderin úırenýde. Olardy biz erkeletip «Qazaqstandyq «Elbrýstyń» balalary» dep ataımyz. Áke-sheshelerdiń saǵynyshyna aınalǵan taýdy – úlkenderge qurmet, taǵzym retinde ortalyqty «Elbrýs» dep atadyq. Oblysta qarashaı-sherkes jáne qabardın-balqar ult ókilderiniń 1 200-den astamy tursa, onyń 900-i balqarlar. О́zimizdi Assambleıanyń kishkentaı otaýy dep sezinemiz. Elbasyna árdaıym alǵys aıtyp otyramyz, – deıdi Márııam Baıramqulova. Farıda BYQAI, «Egemen Qazaqstan» Pavlodar oblysy Sýretti túsirgen Maqsat Aıtbaı