Konstıtýsııanyń 23 babyna ózgerister engiziledi. Bul týraly búgin Aqordada ótip jatqan bılik tarmaqtary arasyndaǵy ókilettikterdi qaıta bólý jónindegi jumys tobynyń kezekti otyrysynda Elbasy Nursultan Nazarbaev málimdedi.
«Biz úshin bir aıqyn másele – Qazaqstannyń negizgi saıası modeli saqtalady. Prezıdenttik respýblıka bolyp qala beredi. Sonymen birge, memlekettik basqarý júıesi dáýir talabyna saı ıkemdi bolýy tıis. Reformalardyń nátıjesinde bıliktiń bir tarmaǵy ókilettigin tolyq ıelenip, derbes jumys isteıdi. Soǵan sáıkes ár tarmaǵy jaýapkershilikti de sezinýi tıis. О́kiletti bıliktiń Úkimet pen atqarýshy organdarǵa baqylaýy kúsheıedi», – dedi Memleket basshysy.
Elbasynyń paıymynsha, bul memlekettiń kásibıligin arttyrýmen qatar Konstıtýsııadaǵy bıliktiń birden bir bastaýy halyq degen qaǵıdany bekite túsedi.
«El bolashaǵy úshin aıryqsha mańyzdy osy qujattyń taǵdyryn biz sheshýimiz kerek. Ári qaraı ne isteýimiz kerek ekendigine búgin qorytyndy jasap, qashan Parlamentke talqylaýǵa túsetindigin kelisýimiz kerek. Konstıtýsııanyń 23 babyna ózgeris engiziletin boldy, zańdarǵa 35 ózgeris engiziledi. Bul jerde aıta ketetin negizgi másele Prezıdenttegi ókilettikterdi basqa tarmaqtarǵa berý bolyp otyr. О́zderińiz de bilesizder, basqa elderde, kerisinshe, prezıdenttiń ókilettigin joǵarylatý úshin referendýmdar ótkizip, konstıtýsııalyq ózgerister engizip jatyr. Bizde kerisinshe. Sebebi, 25 jyldyń ishinde prezıdenttik basqarý júıesi óziniń aldyna qoıǵan halyq aldyndaǵy maqsatyn oryndady», - dedi Nursultan Nazarbaev.