Almaty qalasyndaǵy Ermek Tursynovtyń kınoklýbynda Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» AQ túsirgen «Káýkenniń juldyzy» atty derekti fılmniń tusaýkeseri ótti. Derekti fılm Qazaq KSR-niń halyq artısi, Shyńǵys Aıtmatov atyndaǵy halyqaralyq syılyqtyń jáne Táýelsiz «Tarlan» syılyǵynyń laýreaty, KSRO kınematografıster odaǵynyń múshesi, professor, opera ánshisi, teatr jáne kıno akteri Káýken Kenjetaevtyń ómiri men shyǵarmashylyǵy týraly baıandaıdy. – Káýken aǵamen bes-alty fılmge tústik, talaı birge júrdik, týǵan baýyrlardaı syılastyq. Onyń bireýge renjip turǵanyn eshqashan kórgenim joq. Eshqashan bireý týraly jaman sóz aıtpaıtyn jany taza, júregi pák adam bolatyn. Osy fılmge Káýken aǵanyń shyǵarmalaryn oqýǵa usynys túsken kezde, birden qýana kelistim, – dedi akter Nurjuman Yqtymbaev. – Bul elimizdiń mádenıetine orasan zor úles qosqan aty ańyzǵa aınalǵan tulǵalardyń ómirbaıany týraly jasaǵan birinshi derekti fılmim emes. Buǵan deıin Káýken Kenjetaevtyń baýyry, uly rejısser Sháken Aımanovtyń shyǵarmashylyq jolyna arnalǵan derekti fılm túsirgen bolatynmyn. Sondyqtan da, osyndaı birtýar azamattardy syılaǵan sol dáýirge, sol materıaldarǵa qaıta úńilip, jumys istegenime qýandym. Ásirese, keıipkerimizdiń týǵan jeri – tabıǵaty kórkem, qazaqtyń dástúri men tarıhyna baı Baıanaýyl ólkesi maǵan qatty áser etti. Káýken aǵamyzdyń ishki jan dúnıesiniń qalyptasýyna týǵan jeri úlken áser etti dep oılaımyn, – dedi kartınanyń rejısseri Ǵazız Nasyrov. Aıta ketsek, «Káýkenniń juldyzy» atty qoıylymdyq sahnalary bar derekti fılm 2016 jyly Káýken Kenjetaevtyń 100 jyldyǵyna arnaıy óndiriske jiberilgen bolatyn. Fılm Káýken Kenjetaevtyń týyp-ósken jeri Pavlodar oblysy, Baıanaýyl ólkesinde jáne Almaty qalasynda túsirildi. Káýken Kenjetaevtyń obrazyn jas akter Erjas Raqymbekov somdap shyqty. Oralhan DÁÝIT, «Egemen Qazaqstan»