Darıǵa Nazarbaevanyń tóraıymdyǵymen Parlament Senatynyń Halyqaralyq qatynastar, qorǵanys jáne qaýipsizdik komıtetiniń músheleri Qazaqstan Respýblıkasynyń 2012-2016 jyldarǵa arnalǵan Ulttyq qaýipsizdik strategııasyn iske asyrý boıynsha múddeli memlekettik organdarmen kezdesti.
Ulttyq qaýipsizdik strategııasyn talqylaýǵa Ulttyq ekonomıka mınıstri T.Súleımenov, Syrtqy ister mınıstriniń orynbasary E.Ashyqbaev, Qorǵanys mınıstriniń birinshi orynbasary, general-leıtenant M.Maıkeev, Ulttyq qaýipsizdik komıteti tóraǵasynyń orynbasary D.Dilmanov, sondaı-aq Eńbek jáne halyqty áleýmettik qorǵaý, Din isteri jáne azamattyq qoǵam, Densaýlyq saqtaý, Bilim jáne ǵylym, Energetıka, Qorǵanys jáne aeroǵarysh mınıstrlikteriniń ókilderi qatysty.
Kezdesýge qatysýshylardyń pikirinshe, qazirgi álemde memlekettiń qaýipsizdik máseleleri túbegeıli jańa sıpatqa ıe boldy. Táýelsizdik jyldarynda, memlekettiń ulttyq qaýipsizdikti qamtamasyz etýdegi muqııat jáne maqsatty is-áreketteriniń arqasynda elimizde ulttyq qaýipsizdikti qamtamasyz etýdiń tıimdi tetigi jasaldy, memleket qyzmetiniń osy saladaǵy negizgi baǵyttaryn aıqyndaıtyn tujyrymdamalyq qujattar ázirlendi.
D.Nazarbaeva, sondaı-aq senatorlar N.Ábiqaev, I.Adyrbekov, S.Jaqsybekov, L.Qıynov, G.Kım memlekettik organdardyń osy baǵyttaǵy jumysyn jetildire túsýge qatysty usynystaryn aıtty, dep habarlady Parlament Senatynyń baspasóz qyzmeti.