Elbasynyń jyl saıynǵy Joldaýlarynda memlekettiń áleýmettik-ekonomıkalyq áleýetin arttyrý, onyń qaýipsizdigin nyǵaıtý, el azamattarynyń bostandyqtary men quqyqtaryna kepildik berý, ǵylymdy órkendetý, halyqtyń ál-aýqatyn jaqsartý sekildi ózekti máselelerdi sheshý jaıy kórinis taýyp keledi. Sondyqtan da bolar, Prezıdent Nursultan Nazarbaevtyń «Qazaqstannyń Úshinshi jańǵyrýy: jahandyq básekege qabilettilik» atty bıylǵy Joldaýyn da barsha halyq jyly qabyldady.
Biz de áriptesterimizben birge, Memleket basshysy tarapynan Qazaqstannyń bolashaǵyna, qazaqstandyqtardyń múddelerine qatysty máseleler tereń qarastyrylǵan tarıhı qujattyń ár jolyndaǵy qaǵıdattarmen muqııat tanysqan bolatynbyz.
Elbasynyń bıylǵy Joldaýynda barsha qazaqstandyqtardy biriktirgen, el bolashaǵynyń irgetasyn qalaǵan basty qundylyqtar atap kórsetilgen. Halyqaralyq sarapshylardyń aıǵaqtaýynsha, ýaqyt synynan ótken Qazaqstannyń táýelsizdigi baıandy boldy, qoǵamymyzdaǵy ulttar men ulystar arasyndaǵy aýyzbirlik, beıbitshilik pen kelisim saltanat qurýda. Elimizde joǵary rýhanııatqa negizdelgen zaıyrly qoǵam qalyptasty. Onyń ústine, memleketimiz ındýstrııalandyrý men ınnovasııalarǵa negizdelgen turaqty ekonomıkalyq ósimdi qamtamasyz etýde. Sondaı-aq, ulttyq qaýipsizdik jáne búkilálemdik, óńirlik máselelerdi sheshýge jahandyq turǵydan atsalysyp otyrǵan elimiz búgingi tańda Jalpyǵa Ortaq Eńbek Qoǵamyn qurýǵa baǵdar túzeýde.
Qazaqstandyqtar basqa qonǵan baq – Táýelsizdikti baıandy etý úderisine Elbasynyń bas bolyp kele jatqandyǵyn jadydan shyǵarmaýy kerek. Memleket basshysynyń halyqaralyq qoǵamdastyq moıyndaǵan elimizdiń shańyraǵy bıik, keregesi berik, týyrlyǵy bútin bolýyn kózdep, soǵan búkil aqyl-parasatyn, jiger, qaıratyn jumyldyryp kele jatqanyna, qudaı qalasa, bıyl 26 jyl tolǵaly otyr. Mine, osy ýaqyt aralyǵynda jaryq kórgen Elbasynyń «Qazaqstan-2030» Strategııasy, «Jalpyǵa Ortaq Eńbek Qoǵamyna qaraı 20 qadam», «Qazaqstan-2050» Strategııasy – qalyptasqan memlekettiń jańa saıası baǵyty» atty baǵdarlamalarynan týyndaıtyn mindetterdi júzege asyrýdaǵy el Úkimetiniń qoldanǵan sharalary Qazaqstannyń álemdegi básekelestikke qabiletti elý eldiń sanatynan tabylýyna jáne halyqaralyq qoǵamdastyqtaǵy barynsha órkendegen otyz eldiń qatarynan kórinýge batyl qadam jasaýyna múmkindik týǵyzýda. Al Elbasynyń bıylǵy «Qazaqstannyń Úshinshi jańǵyrýy: jahandyq básekege qabilettilik» atty Joldaýy keń-baıtaq elimizdiń damý joldaryn naqtylap berdi.
Elbasy álem jahandanýǵa bet burǵan tusta buıyrǵan táýelsizdigimizdi nyǵaıtatyn da, ony odan ári baıandy etetin de jastar ekendigin únemi aıtyp keledi. Soǵan baılanysty elimiz egemendigin alǵan alǵashqy jyldardyń ózinde-aq týyndaǵan áleýmettik-ekonomıkalyq qıyndyqtarǵa qaramastan, qabiletti, daryndy jastardy «Bolashaq» baǵdarlamasy boıynsha shetel asyryp oqytty. Endi, mine, olar lek-legimen elge oralyp, memlekettik bılik júıesiniń jaýapty býyndarynda, ekonomıka salasyndaǵy qurylymdarda basshylyq tizginin qolǵa alýda.
Búginde jasy qyryqtan asqan bizder burynǵy ýnıtarlyq-totalıtarlyq júıe ydyrar aldynda ǵana mektepti aıaqtap, joǵary oqý ornynyń tabaldyryǵyn endi ǵana attaǵan jastar edik. Elbasynyń bas bolýymen jas memleketimizdiń Konstıtýsııasyn jazýǵa atsalysqan ǵalym-zańgerler Ǵ.Saparǵalıev pen M.Baımahanovtan dáris alyp, táýelsiz elimizdiń zańnamasyn oqyp-úırendik. Áli de úırený ústindemiz. О́ıtkeni, jahandaný aıasy – óte kúrdeli úderis. Úzdiksiz izdenip, bilimiń men biligińdi ushtap otyrmasań, órkenıet kóshinen keıindep qalyp qoıýyń ábden múmkin. Bul – Elbasynyń artqan senimin aqtaýdy paryzy sanaıtyn ár adamnyń udaıy jadynda bolatyn qaǵıda. Tek sonda ǵana ol kindik qany tamǵan týyp-ósken jeriniń túlegi, egemen eldiń belsendi azamaty retinde Elbasynyń Joldaýlarynan týyndaıtyn mindetterdi júzege asyrýǵa úles qosa alady.
Darhan JABAEV,
Qazaq ekonomıka, qarjy jáne halyqaralyq saýda ýnıversıtetiniń aǵa oqytýshysy
ASTANA