Atyraýda sporttyń jekpe-jek túrinen erler jáne qyzdar arasyndaǵy Qazaqstan chempıonaty ótti. Elimizdiń túkpir-túkpirinen Jaıyq jaǵasyna jınalǵan 200 sportshy eki kún boıy baqtary men baptaryn synǵa saldy.
Jarystyń ashylý saltanatyna qatysqan oblys ákimi Nurlan Noǵaev bul sport túrinen el chempıonaty Atyraýda alǵash ret uıymdastyrylyp otyrǵanyna toqtaldy. KSRO jáne Qazaqstannyń eńbek sińirgen jattyqtyrýshysy, erejesiz jekpe-jekten álemniń birneshe dúrkin chempıony, Dúnıejúzilik jekpe-jek qaýymdastyǵynyń prezıdenti Sabyrjan Mahmet dúbirli dodanyń namysty da jigerli jastardy tárbıeleýdegi mańyzyn basa aıtty.
– Jarys álem chempıonatyna irikteý týrnıri retinde ótti. Júldegerler Astana qalasynda EKSPO-2017 kórmesine arnalyp uıymdastyrylatyn álemdik dodada baq synaıdy, – deıdi oblystyq jekpe-jek ulttyq sport federasııasynyń prezıdenti Mádıhan Bekbenbetov. – Atyraýdyń atynan jarysqa shyqqan qyzdarymyz joq, sebebi oblystyq jekpe-jek ulttyq sport federasııasynyń ashylǵanyna bir jyldaı ǵana ýaqyt ótti. Atyraýlyq arýlar bul sport túrine endi ǵana qadam basyp jatyr. Qazir oblys ortalyǵynda eki jáne Qurmanǵazy, Jylyoı, Inder aýdandarynda bólimshelerimiz bar. Az ýaqyttyń ishinde atalǵan sport túrinen eki álem jáne bes Qazaqstan chempıondary tárbıelenip shyqty.
Eki kúnge sozylǵan saıys qorytyndysynda jalpykomandalyq esepte almatylyqtar júlde sany boıynsha I oryn aldy. Ekinshi oryn Aqtóbe oblysy komandasyna buıyryp, atyraýlyqtar úshinshi orynǵa ilikti. Al 85 kılo salmaq dárejesinde jeńiske jetken atyraýlyq Isataı Temirovti óńir basshysy arnaıy syılyqpen marapattady.
Baqytgúl BABASh,
«Egemen Qazaqstan»
ATYRAÝ