Úkimet franshıza boıynsha shyǵyndardy sýbsıdııalaý máselesin qarastyrady, delingen "Aq jol" partııasynyń osy másele týraly depýtattyq saýalynda, dep jazady informburo.kz.
"Aq jol" partııasy fraksııasy ataqty markalardyń franshızasyn satyp alý úshin bıznesmenderge úkimettiń qoldaý berýin suraıdy. Al buryn mundaı qoldaý ózimizdiń jańa brend jasaýshylarymyzǵa beriletin edi.
"Aq jol" partııasynyń saýalyna jaýap retinde úkimet halyqaralyq franchaızıngtiń basym baǵyttaryn zertteıtinin aıtty.
"2025 jylǵa deıin shıkizattyq emes sektordy eki ese arttyrý týraly Prezıdenttiń tapsyrmasy bar. Ol úshin memleket basshysy "velosıpedti qaıta oılap tappaı" burynnan qalyptasqan jahandyq óndiris tizbegin ary qaraı alyp ketýdi usynady. Ol úshin elge transulttyq kompanııalardyń kelýin yntalandyrý kerek", - delingen saýalda.
Franchaızıngtiń bir artyqshylyǵy sonda, ataqty kompanııalar ónimdi daıyndaý ádisteri men tehnologııalaryn ózderi kelip úıretedi. Sonymen qatar, ónimniń sapasyna da ózderi jaýap beredi. Bul óz kezeginde Qazaqstandaǵy baqylaý organdaryna degen táýeldilikten aryltyp, jemqorlyqtyń jolyn kespek.
"Álemdik kóshbasshy kompanııalardyń franshızasynyń tym qymbattyǵyna qaramastan, jıyrma birinshi ǵasyrda shaǵyn jáne orta bıznestiń 50 paıyzy franchaızıng júıesimen jumys isteıtini belgili", - deıdi aqjoldyqtar.
Partııanyń depýtattyq fraksııasy franchaızıng boıynsha ózderiniń naqty usynystaryn bildirip, álem boıynsha Qazaqstanǵa eń qajetti kompanııalardyń tizimin jasaýdyń qajettiligin alǵa tartty.
"Depýtattyq saýalǵa jaýap bergen Saǵyntaev Úkimettiń Dúnıejúzilik bankpen birlesip shaǵyn jáne orta bıznestiń básekelestigin arttyrý jobasy daıyndalýda. Osy jumystar aıasynda "Atameken" kásipkerlerdiń ulttyq palatasy janynan tasymaldaýshylardy damytý qyzmeti qurylmaq", - dep habarlaıdy "Aq jol" partııasy.