Nursultan Nazarbaev Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Qaırat Qojamjarovty qabyldady. Bul týraly akorda.kz habarlady.
Kezdesýde Q.Qojamjarov Elbasyny agenttiktiń qazirgi qyzmeti týraly habardar etip, «100 naqty qadam» ult josparyn iske asyrý aıasynda atqarylyp jatqan jumystar jóninde baıandady.
Nursultan Nazarbaev ortalyq memlekettik jáne jergilikti atqarýshy organdardaǵy bos turǵan oryndardy qysqartý, sondaı-aq eńbekaqy tóleý qorynyń qarajatyn qaıta bólý arqyly engizilip jatqan memlekettik qyzmetshilerdi yntalandyrýdyń bonýstyq júıesiniń mańyzdylyǵyn atap ótti.
Q.Qojamjarov «B» korpýsyndaǵy memlekettik qyzmetshilerdi attestasııalaý barysy týraly habarlap, attestasııadan ótýshiler jaqsy nátıje kórsetip jatqanyn aıtty. Agenttik tóraǵasynyń aqparaty boıynsha, búginge deıin Joǵary attestasııalyq komıssııanyń 14 otyrysy bolyp, respýblıkalyq deńgeıde 700-den astam qyzmetker áńgimelesýden ótken.
Sondaı-aq, agenttik tóraǵasy «A» basqarýshy korpýsyn reformalaýǵa qatysty usynystar jóninde baıandady. Onda qyzmetkerlerdiń osy sanatyna jatatyn laýazymdar qataryn qysqartý kózdelgen.
Qazaqstan Prezıdenti sybaılas jemqorlyqpen kúresý, udaıy onyń aldyn alý jumysyn sapaly júrgizý qajettigine de nazar aýdardy.
– Qylmystyq qýdalaý tek zań aıasynda ǵana júzege asyrylýǵa tıis. Azamattardy salmaqty negizdersiz jáne bultartpaıtyn dáleldersiz tutqyndaýǵa bolmaıdy, – dedi Nursultan Nazarbaev.
Memleket basshysy kezdesý qorytyndysy boıynsha birqatar naqty tapsyrma berdi.