Talapkerlerdi Ulttyq biryńǵaı testileýge daıarlaý maqsatynda «Egemen Qazaqstan» gazeti men «Ulttyq testileý ortalyǵynyń» birlesken jobasy negizinde jaryq kórgen «Oqý saýattylyǵy» boıynsha testileý materıaldary (№42, 1 naýryz, 2017 jyl) qalyń oqyrmandy beı-jaı qaldyrǵan joq. Jańa formattaǵy testileý materıaldarynyń mátindik sapasyna nazar aýdarǵan jurtshylyq ınternet resýrstary men áleýmettik jelilerde oı-pikirlerin aıtyp, qyzý talqylady. Osyǵan oraı gazetimizge «Ulttyq testileý ortalyǵy» RMQK-nan kelip túsken túsindirmeni nazarlaryńyzǵa usynyp otyrmyz.
Ulttyq testileý ortalyǵynyń túsindirýinshe, qoǵamda shý týdyryp otyrǵan test tapsyrmasy synama (baıqaý) testilerinde ǵana kezdesedi. Qazirgi ýaqytta atalǵan suraq synama test tapsyrmalary bazasynan alynyp tastaldy.
Halyqaralyq tájirıbe boıynsha oqý saýattylyǵyn baǵalaýda túrli formattaǵy mátinder qoldanylady. Ony jalpylama jáne jalqy mátinder túrinde qarastyrýǵa bolady. Jalpylama mátinderge bir dúnıeni kórkem-ádebı tilde sýretteý jáne tehnıkalyq sıpattamasyn jasaý, belgili bir taqyryptardy talqylaý, baıandaý, ol týraly pikir men kózqaras bildirý jatady. Al jalqy mátinderge aqparattyq paraqshalar, habarlandyrýlar, shaqyrýlar, kesteler jáne grafıkalar, dıagrammalar, kartalar jáne taǵy basqalar kiredi. Iаǵnı, baıqaý synaǵynda jarııalanǵan «Budan keıin kıno túsiremin be, bilmeımin» atty rejısser E.Tursynovtyń suhbatynyń úzindisi jalpylama mátinge jatady. Pedagogıkalyq ólshem erejelerine sáıkes, oqý saýattylyǵyn baǵalaý úshin mátinderdi túrli ashyq derekkózderden paıdalanýǵa bolady (kitaptar, sózdikter, ensıklopedııalar, ǵylymı-kópshilik saıttar, gazetter jáne taǵy basqalar).
Áleýmettik jelide synǵa ushyraǵan test materıalyna paıdalanylǵan mátin belgili kınodramatýrg, rejısser Ermek Tursynovtyń suhbatynan alynǵan. Derekkózi – https://www.dalanews.kz/17266 saıty. Bul suhbat «Qala men dala» gazetiniń saıtynda 2016 jyldyń 10 shildesinde jarııalanǵan. Suhbat mátininde belgili tulǵanyń jeke ómirine qatysty suraq joq. Rejısserdiń otandyq kıno salasyna qatysty jalpy kózqarasy jazylǵan. Tek Baıan Esentaeva men Nurtas Adambaıdyń esimderi suhbat mátininde kezdesetindikten, №14 tapsyrmada dıstraktor (burys jaýap) retinde qoldanyldy. Osyndaı dıstraktorlardy irikteý ádisi test tapsyrmalaryn shyǵarý barysynda (testologııa salasynda) qoldanady. Oqýshyǵa aldyn ala tanysyp, test tapsyrmasyna jaýap berýge tıesili aqparat alýy úshin suhbat mátini beriledi.
Oqý saýattylyǵynyń suraqtary oqýshynyń tómendegideı daǵdylaryn tekserýge arnalǵan: sóz maǵynasy men mátin qurylymyn túsiný, dálelder keltire bilý, jeke oıy men tájirıbesine súıene otyryp oı qorytý. Bul mátin de oqýshynyń joǵaryda aıtylǵan daǵdylardy qalyptastyrýy, damytýy jáne qabiletterin tekserýi úshin berilgen. Atalǵan mátin baıqaý synaqtary nusqalarynyń birinde usynylǵan. Osy nusqadaǵy UBT tapsyrmalary elimizdiń túkpir-túkpirine 200 myńnan astam taralymmen taraıtyn «Egemen Qazaqstan» gazetinde jarııalandy. Osylaısha, ınternet jelisine qoly jetpeıtin, onlaın baıqaý synaǵyn tapsyrýǵa múmkindigi joq alys óńirlerdegi oqýshylarǵa jańa format boıynsha UBT-ǵa daıyndalý múmkindigi qarastyrylyp otyr. Elimizdiń bas basylymy arqyly oqýshylar bıylǵy UBT-da kezdesetin tapsyrmalar úlgisimen tanysyp, emtıhanǵa daıyndala alady.