Atyraýda ótip jatqan Dúnıejúzilik boks serııasynda (WSB) qazaqstandyq «Astana Arlans» pen qytaılyq «China Dragons» komandalary qolǵap túıistirdi. Alǵash bolyp sharshy alańǵa 49 kıloda Temirtas Júsipov pen Dzıýndzıýn He shyqty.
Birinshi raýndta Temirtas rıng ıesi ekenin bildirgendeı, alǵa umtylyp, soqqylaryn daryta bildi. Qarsylasynyń birneshe shabýyldarynan sytylyp shyǵyp ketip jatty. Tóreshiler jerlesimizdiń sheberligin nazarǵa ala otyryp, birinshi raýndta biraýyzdan jeńisti berdi.
Kelesi kezeńde Júsipov shabýylǵa jıi umtylǵanmen, soqqylaryn dóp tıgize almady. Al qytaılyq boksshy qaıta urymtal tustarda múmkindigin múlt jibermeýge tyrysyp jatty. Sáti kelgende otandasymyzdyń búıirinen de uryp jatty. Osyǵan baılanysty bul kezeńniń qorytyndysy boıynsha He Dzıýndzıýn alǵa shyqty.
Úshinshi raýndta otandasymyz olqylyqtarynyń ornyn toltyrý úshin qarsylasyn qysymǵa alyp, qarsy soqqylarynan qutylyp ketip júrdi. Tóreshiler de sáıkesinshe qazaqstandyqtyń ónerine oń baǵasyn berdi.
Tórtinshi raýndta Temirtastyń mysy basyp, birneshe soqqylaryn dál tıgizdi. Jankúıerleriniń qoldaýynan rýhtanǵan ol He Dzıýndzıýnge esh múmkindik bere qoımady.
Sońǵy raýndta Aspanasty eliniń boksshysy baryn saldy. Tipti, joıqyn soqqylaryn da daryta bildi.
Qorytyndysynda Temirtas Júsipov jeńiske jetti.