Atyraýda ótip jatqan Dúnıejúzilik boks serııasynda (WSB) qazaqstandyq «Astana Arlans» pen qytaılyq «China Dragons» komandalary qolǵap túıistirdi. Tórtinshi bolyp rıngke 75 kıloda Saparbaı Aıdarov pen Jao Mıngan shyqty.
Bastapqy eki raýndta otandasymyz aıqyn basymdyqqa ıe boldy. Qytaıdyń tájirıbeli boksshysynyń alǵa qoıǵan josparyn oryndaýyna múmkindik bere qoımady. Mańdaıyn eńkeıtip alyp, tek qorǵanýmen boldy.
Úshinshi raýndta da solaqaı boksshymyz Saparbaı qarqynynan jańyla qoımady. Jao Mıngandy tyqsyrtyp júrip, soqqylaýmen boldy.
Kelesi raýndta qytaılyq sportshy ara-tura shabýyldamaq bolǵan. Biraq Saparbaı Aıdarov qarsy soqqylaryn dóp tıgize bildi.
Sońǵy úsh mınýtta Jao Mıngan jekpe-jektiń tezirek aıaqtalýyn kútip júrgendeı boldy. Aıtarlyqtaı shabýylǵa shyǵyp, jerlesimizge dál soqqylaryn tıgize almady.
Nátıjesinde otandasymyz Saparbaı Aıdarov bes raýndta da basym túsip, jeńisti enshiledi.