Naýryzdyń basynda Túrkııanyń Qazaqstandaǵy Tótenshe jáne ókiletti elshisi Nevzat Ýıanyk qazaq-túrik lıseıleriniń (QTL) Túrkııa bilim mınıstrligi basqarýyna ótetindigin aıtqan bolatyn. QR Bilim jáne ǵylym mınıstrligi mundaı sharanyń bolý yqtımaldyǵynyń ózin resmı túrde joqqa shyǵardy.
«QTL «Bilim-ınnovasııa lıseıleri» bolyp qaıta qurylyp, qazaqstandyq bilim berý standarttary boıynsha jumys isteıdi», delingen mınıstrliktiń baspasóz qyzmeti taratqan málimdemede.
Sonymen qatar, jańa ataý berilgen oqý oryndarynyń jumysy ózgermeıtindigi atap ótildi.
«QR Bilim jáne ǵylym mınıstrligi men QR Syrtqy ister mınıstrligi osy másele boıynsha birigip málimdeme jasaıdy. Oǵan deıin QR Bilim jáne ǵylym mınıstrligi qazaqstandyqtardy Túrkııa elshisiniń jasaǵan málimdemesine baılanysty alańdamaýlaryn suraıdy. «Bilim-ınnovasııa lıseıi» jumysynyń ádettegi tártibi ózgerissiz qalady», delingen habarlamada.
Aıta keterligi, «Bilim-ınnovasııa lıseıi» - jurtshylyq arasynda joǵary bedel men qurmetke ıe bolyp kelgen bilim berý mekemesi. Qazaq-túrik lıseıleriniń bári 2016 jyly «Bilim-ınnovasııa lıseıleri» bolyp qaıta quryldy.