Eýrazııalyq ekonomıkalyq odaqqa tóraǵalyq etý aıasynda Qyrǵyzstan bıznestiń damýyna jaǵdaı jasaý kerektigine kóńil aýdarady, dedi Qyrǵyzstannyń premer-mınıstri Saýranbaı Jánibekov.
«Joǵarǵy Eýrazııalyq ekonomıkalyq keńestiń tóraǵasy Almasbek Atambaev odaqqa múshe memleketterdiń basshylaryna qarata jasaǵan málimdemesinde 2017 jyly Eýrazııalyq keńistikte bıznesti damytýǵa jaıly jaǵdaı jasaýǵa kóńil aýdarýǵa shaqyryp, 2017 jyly odaq qyzmetiniń basty aspektilerin naqtylady", - dedi Jánibekov Eýrazııalyq úkimetaralyq keńesiniń keńeıtilgen otyrysynda.
«Atap aıtar bolsaq, kún tártibindegi máselelerdiń biri ınvestısııalyq saıasatty jandandyrý, EAEO elderinde jumys isteıtin azamattar men olardyń otbasyna zeınetaqymen qamtamasyz etý týraly kelisimge qol qoıý, sandyq keńistikti qurý strategııasyn daıyndaý, ónerkásiptik yqpaldastyqtyń basym baǵyttaryn iske asyrý, EAEO sharttary naryǵyn lıberızasııalaý, EAEO múshe memleketterdiń birlesken kólik saıasatyn iske asyrý baǵyttary men kezeńderin oryndaý, Odaqtyń ortaq qarjy naryǵyn qurý tujyrymdamasyn daıyndaý", - dedi Jánibekov.
Onyń aıtýynsha, osy jumystardy oryndaý úshin birlese jumys isteý kerek.
«Osy maqsatta Eýrpazııalyq ekonomıkalyq komıssııa men múshe memleketterdiń úkimetterine birlesip jaqyn arada EAEO memleketteriniń basshylaryna Joǵarǵy keńesiniń tóraǵasyna baǵyttalǵan úndeýde aıtylǵan bastamalardy iske asyrý sharalarynyń josparyn daıyndaýdy tapsyrý kerek", - dedi Saýranbaı Jánibekov.