Reseı Sberbanki Qazaqstan men Túrkııada ıslam bankıngi jobalaryn damytýdy kózdep otyr. Bank baspasóz qyzmetiniń málimdeýinshe, Qazaqstan TMD-da seriktestik bankıng damytýǵa arnalǵan bolashaǵy bar naryqtardyń biri retinde qarastyrylýy múmkin. Degenmen, qarjy ınstıtýty qandaı da bir jobalar týraly aıtýǵa áli erte ekenin aıtady, dep jazady abctv.kz.
«Biz qazir halyqaralyq naryqtarda enshiles bankterdiń qarjylandyrýmen iske asyrylatyn jobalardyń tizimin jasap jatyrmyz. Onyń ishinde túrkııalyq DenizBank-pen birlesip qarjylandyrylatyn jobalar bar, al keler aptada Almatydaǵy áriptesterimizben 2017 jylǵy jol kartasyn talqylaýymyz kerek», — dedi bank ókili.
Reseılik Sberbank basshylarynyń aıtýynsha, Qazaqstanda shaǵyn jáne orta kásipti damytýǵa arnalǵan jobalardy damytý úshin eldegi zańnama aıasynda balama resýrstardy tartýdyń amaldaryn izdeıdi.
«Thomson Reuters Islamic Growth Markets Investment Outlook esebine sáıkes, 2015 jyly Islam seriktestik uıymyna kiretin 57 memlekettiń ishinen ınvestısııa tartý boıynsha Qazaqstan 5-orynǵa jaıǵasqan. Investorlardyń «tábeti» men qalaýyn biletinder úshin bul kórsetkish óte mańyzdy», — deıdi qarjy ınstıtýty.