Qurlyqtyq hokkeı lıgasy (QHL) «Barys» komandasynyń qandaı jaǵdaıda óz oıyndaryn Almaty men Astanada ótkize alatynyn habarlady.
Buǵan deıin 2017 jylǵy qysqy Ýnıversıada oıyndaryn uıymdastyrý jáne ótkizý dıreksııasynyń apparat basshysy Dıdar Saǵadıev astanalyq klýbqa «Astana Arlandarynan» úlgi alyp, óz matchtaryn tek «Barys-Arenada» ǵana emes «Almaty-Arenada» ótkizýi kerektigin alǵa tartqan bolatyn, dep habarlady vesti.kz.
«Ýnıversıada kezinde Almaty turǵyndarynyń da hokkeıge qyzyǵýshylyqtary joǵary ekenin baıqadyq. Biraq QHL-ge eki birdeı qazaqstandyq klýbty tirkeý biraz qarjyny talap etedi. Degenmen, Almatyǵa da hokkeı kerek. «Astana Arlandary» jekpe-jekterin elimizdiń ár óńirinde ótkizetindigin kórip, «Barystyń» oıyndaryn Astana men Almatyda da ótkizse eken degen usynysymdy bildiremin. Qalamyzda da halyqaralyq talaptarǵa saı muz aıdynymyz bar. Sondyqtan barlyǵyn jan-jaqty qarastyryp, osy isti qolǵa alý kerek», – dedi Dıdar Saǵadıev.
QHL-diń baspasóz qyzmeti lıga tártibi boıynsha komandalardyń arenalar sanyna shekteý qoıylmaıtynyn, biraq barlyq talaptarǵa saı bolýy kerektigin habarlady.
«Árbir klýbtyń óz matchtaryn ótkizetin arenalar sanyna shekteý qoıylmaıdy. Basty talap – barlyq talapqa saı bolý. Eger «Barys» klýby óz oıyndaryn eki qaladaǵy arenalarda ótkizý týraly nıet bildirse, kóremermenderdiń yńǵaıyna qaraı Lıga bul ótinishti qarap shyǵýǵa daıyn», – delingen habarlamada.
Aıta keteıik, QHL ruqsat etken jaǵdaıda «Barys» tek kelesi maýsymnan bastap qana ózge arenada ótkize alady. Qazir elordalyqtar Gagarın Kýbogyna qatysyp jatyr. Búgin Astana ýaqyty boıynsha 20:00-de Magnıtogorskide jergilikti «Metallýrg» komandasymen kúsh synasady.