Orta salmaqta WBA (Super), IBO, WBC jáne IBF tujyrymdary boıynsha álem chempıony qazaqstandyq Gennadıı Golovkın aldaǵy qarsylasy WBA (Regular) belbeýiniń ıegeri Dennıel Djeıkobs jaıly oı bólisti.
«Bizdiń jekpe-jegimizde nokaýt tirkeletinin aldyn ala boljap aıta almaımyn. Bul boks. Dennı keremet boksshy. Maǵan qaraǵanda kúshi de kóbirek sııaqty. Men úshin ol qaýipti sportshylardyń biri. Qarsylastaryn qyspaqqa alyp, shabýylǵa jıi shyǵatynyn aıta ketken jón. О́zindik ádisi de bar, tehnıkasy da myqty. О́z basym ony qatty syılaımyn», – dedi Boxingnews24.com basylymyna bergen suhbatynda.
Aıta keteıik, Dennıel Djeıkobs 2011 jyly isik dertine shaldyǵyp, dárigerler boksqa qaıta oralýyna tyıym salǵan. Biraq aýrýyn jeńgenmen qoımaı, búginde orta salmaqtaǵy úzdi boksshylardyń biri atanyp júr.
Golovkın men Djeıkobs arasyndaǵy aıqas 18 naýryz kúni AQSh-tyń Nıý-Iork qalasyndaǵy Madison Square Garden arenasynda ótedi. Elimizde bul aıqasty 19 naýryzda «Qazaqstan» jáne «KazSport» telearnalary tikeleı efırde kórsetedi.