Aqordada Memlekettik hatshy Gúlshara Ábdiqalyqovanyń tóraıymdyǵymen Memlekettik rámizder men vedomstvolyq jáne olarǵa teńestirilgen ózge de nagradalar geraldıkasy máseleleri jónindegi memlekettik komıssııanyń otyrysy ótti.
Komıssııa basqosýynda Mádenıet jáne sport mınıstrliginiń jaýapty hatshysy Q.Ýálıevtiń Qazaqstan Respýblıkasy Memlekettik rámizderiniń 25 jyldyǵyn atap ótý boıynsha josparlanǵan is-sharalarǵa qatysty aqparaty tyńdaldy. Memlekettik hatshy:
– О́zderińizge belgili, bıylǵy jyly memlekettik rámizderimiz – Memlekettik tý men Eltańbamyzdyń qabyldanǵanyna 25 jyl tolady. Bul – eldikti jáne egemendikti aıqyndaıtyn ataýly data. Sondyqtan osy merekeler aıasynda Astana, Almaty qalalary arnaıy is-sharalar ótkizýge tıis. Memlekettik rámizderdiń 25 jyldyǵyn merekeleýdegi basty maqsat – Máńgilik El murattaryn, qazaqstandyq patrıotızmdi nasıhattaý, óskeleń urpaqty Táýelsizdikti qorǵaýǵa, baǵalaýǵa tárbıeleý, – dedi.
Sonymen qatar, komıssııa músheleri Qorǵanys mınıstrligi bekitýge tıisti «El qorǵany» vedomstvolyq nagradasyn bekitý týraly usynysty qarady. Qorǵanys mınıstri Sáken Jasuzaqovtyń aıtýynsha, bul nagrada erligimen, eńbegimen erekshelengen áskerılerge berilýge tıis.
– Biz bul medaldy erligimen, eńbegimen erekshelengen áskerılerdi – generaldar quramyn, ofıserlerdi, serjanttar men soldattardy marapattaýdy josparlap otyrmyz. Sonymen qatar, qorǵanys kúshteriniń áleýetin kúsheıtýge súbeli úles qosqan basqa da azamattar marapattalady. Menińshe, qatardaǵy jaýyngerlerden bastap, generaldarǵa deıin áskerı qyzmette kózge túskeni úshin ózimizdiń tól vedomstvolyq medaldy ıelengeni durys bolady, – dedi general-polkovnık S.Jasuzaqov.
Memleket basshysy «El qorǵany» medalin taǵaıyndaý týraly usynysqa qoldaý bildirgen. Jańa nagrada bıylǵy jyly atalyp ótiletin qorǵanys kúshteriniń 25 jyldyǵy qarsańynda tapsyrylady dep josparlanyp otyr.
Arnur ASQAR,
«Egemen Qazaqstan»