Osydan alty jyl buryn kóligi buzylyp, aqyrǵan aıazdy aqpanda dalada qalyp, eki aıaqtyń tizeden tómen bóliginen jáne qoldarynyń jeti saýsaǵynan aıyrylǵan Alekseı Rýdenkonyń dárigerlerden kóńili qalǵany sonshalyq, aıtarǵa sózi, atarǵa oǵy joq. Múgedek jan muńyma eshkim qulaq asar emes dep nalıdy. Aıtýynsha, tıisti qujattardy ýaqtyly resimdemeý kesirinen múgedektigi úshin tıesili 46 myń teńge járdemaqy qolyna tımeı qalǵan. Oǵan ýchaskelik dárigerdi kinálaıdi. Bir aı boıy jalǵyz tabys kózimnen qaǵyldym. Mundaı jaýapsyz adamdardy qyzmetten qýý kerek, deıdi onsyz da qabaǵy qatýly kembaǵal jan ashýǵa boı aldyryp.
Meıramhanalardyń birinde qoımashy bolyp istegen ol ǵariptikke ushyraǵannan keıin áıeli ketip qalypty. Jalǵyz uly da qaraılaspaıtyn kórinedi. Ony bulardyń qylyǵy emes, jergilikti sheneýnikterdiń ómirdiń aýyr taýqymetin tartqan kembaǵaldardyń taǵdyryna degen nemketti kózqarasy ashyndyratyn tárizdi. «Aıaq-qolym endi ósip shyqpaıdy ǵoı. Olaı bolsa, meni dárigerlik tekserýden ótkizip, qaıta-qaıta sandaltqansha ómirlik múgedektikke nege shyǵarmaıdy», dep shyryldaǵan daýysy saı-súıekti syrqyratqanmen, oblystyq eńbek jáne áleýmettik qorǵaý, kóshi-qon departamenti basshysynyń orynbasary Janar Nurbek atalǵan jaıtty zańnama sheńberinde qarastyratynyn aıtady.
– 62 jastaǵy azamattyń jaǵdaıymen jaqsy tanyspyz. Onyń múshkil hali bizdi de beıjaı qaldyra almaıdy. Qolymyzdan kelgenshe járdemdesip jatyrmyz. 2011 jyly aıaǵyna ota jasalyp, birinshi toptaǵy múgedektik berilgen. 2012 jyly ekinshi topqa ómirlik múgedektik aldy. Osydan eki jyl buryn birinshi toptaǵy múgedekke aýystyryldy. Bul talaptar medısınalyq-áleýmettik saraptama qorytyndylary boıynsha júzege asyryldy. Anatomııalyq kemistikter týraly erejeden aýytqýǵa esh qaqymyz joq, – deıdi basqarma basshysy.
Dárigerlerdiń sheshimimen Alekseıge byltyr aıaǵyna ota jasatýǵa keńes berilgen. Alaıda, ol odan da, áleýmettik qyzmetker kómeginen de bas tartyp otyr. Talaby – ómirlik múgedektikke kóshirý. Ony belgileýdiń óz tártibi bar ekenin, naýqas belgili ýaqyt aralyǵynda dınamıkalyq baqylaýǵa alynatynyn túsingisi kelmeıdi. Sodan keıin ǵana medısınalyq-áleýmettik saraptama qorytyndysy boıynsha ómirlik múgedektikti berý-bermeý, ne basqa topqa aýystyrý máselesi qaralyp, sheshim qabyldanady.
О́mir ESQALI,
«Egemen Qazaqstan»
Soltústik Qazaqstan oblysy