Nege deseńiz, osydan biraz buryn otandyq BAQ-tarda qurama komandanyń Áıgerim Isaeva, Áıgerim Jeksembınova, Ámına Ermahanova, Aınur Kereı-Baımahanova jáne Arna Toqtaǵan syndy burynǵy músheleri Janna Demchenko bastaǵan jattyqtyrýshylar shtabyndaǵy kemshilik ataýlyny aıdaı álemge jarııa etken bolatyn. Dál osy máseleni qaýzaǵan «Mánerlep júzýdegi mánsiz áńgime» (№29025; 3.03.2017j.) atty maqala elimizdiń bas basylymy «Egemen Qazaqstan» gazetinde de jaryqqa shyqqan edi.
Munda sýda mánerlep júzýdiń sheberleri jattyqtyrýshylar shtabyndaǵy uzaq ýaqyttan beri qalyptasqan berekesiz tirlikti qatty synǵa alǵan bolatyn. Máselen, olar sportshylardyń kıimine dep bólinetin qarajattyń qaıda ketip jatqanynan habarsyz ekendikterin aıtqan edi. Jattyqtyrýshylardyń sportshylardan bas bapkerge arnap jylý jınaıtyndyǵy da osy áńgimeden keıin áshkere bolǵan-tyn.
Budan bólek, mánerlep júzýshiler baspasóz máslıhatyn ótkizip, qordalanyp qalǵan problemany aıtyp qana qoımaı, Qazaqstan Respýblıkasy Sý sporty federasııasynyń prezıdenti Tımýr Qulybaevtan bul máseleniń aq-qarasyn aıyryp, sheshim tabýyna kómektesýin ótingen bolatyn.
Janna Demchenkonyń esimi sý sporty salasynan habary bar qaýymǵa jaqsy tanys. Ol 1998 jyldan bastap mánerlep júzý boıynsha Qazaqstan Ulttyq qurama komandasynyń bas jattyqtyrýshysy bolyp qyzmet etip keldi. Quramany jıyrma jylǵa jýyq ýaqyt bılep-tóstegen kezinde maman retinde baǵyndyrǵan bıikteri de joq emes. Mysaly, Demchenkonyń jetekshiligimen el quramasy Azııa oıyndarynda qola júldege birneshe márte qol jetkizdi. Sondaı-aq, qurama komanda 2000 jyldan beri ótken jazǵy Olımpııa oıyndarynyń birde-birin jibermeı qatysyp keldi.
Sonymen, qurama komandany jıyrma jylǵa jýyq ýaqyt jumsa judyryǵynda, ashsa alaqanynda ustap kelgen Demchenkonyń dáýreni aıaqtaldy. Endigi másele – mánerlep júzýdegi mánsiz áńgimege osymen núkte qoıyla ma? Áńgime sonda…
Qaırat ÁBILDINOV, «Egemen Qazaqstan»
ASTANA