Qazaq tiliniń mártebesi ósedi
«Qazaq tili men qazaq ádebıetine qatysty barlyq dúnıe árqashan mańyzdy. Bul týraly Bilim jáne ǵylym mınıstrligi jan-jaqty málimet berdi. Olar kerisinshe emtıhan tapsyrý kezindegi qazaq tiliniń rólin kúsheıtti. Qazirgi kezde mınıstrlik UBT-ny ekige bóldi: mektep bitirý emtıhany jáne joǵary oqý ornyna túsý emtıhany. Bitirý emtıhanynda qazaq tili qaldyryldy jáne ol attestatqa áser etedi. Ýnıversıtetke oqýǵa túsýshilerge qaraǵanda mektep bitirýshiler aıtarlyqtaı kóp. Iаǵnı, bul qazaq tiliniń mártebesi odan ári óse túsedi degendi bildiredi», dedi mınıstr. D.Abaev aptanyń aqparattyq aǵynynyń arasynan almatylyq Vıacheslav Popovtyń málimdemesine erekshe toqtaldy. Ol óziniń Facebook-tegi paraqshasynda jarty jyl ishinde qazaq tilin úırenýge qulshynys tanytyp otyrǵanyn jazǵan bolatyn. «Men Vıacheslav Popovtyń qazaq tilin úırenemin degen deklarasııasyn ózime túrtip aldym. Muny qadaǵalaıtyn bolamyn. Aqparat jáne kommýnıkasııalar mınıstri retinde meni de qazaq tiliniń oqylmaı, belsendi túrde talqylanatyny, al azamattardyń qyzyǵýshylyǵy eleýsiz qala beretini tańdandyrady», dedi vedomstvo basshysy.
Ushý qaýipsizdigi udaıy nazarda
«Azamattarymyzdyń azamattyq avıasııadaǵy qaýipsizdikke nazar aýdarýy túsinikti. Qazir qyzmettik tergeý júrip jatyr. Onyń nátıjesi boıynsha aqparat quraldarynda jetkilikti málimet beriledi. Qazirdiń ózinde bizge ushqyshtar ekıpajy nusqaýlyqty qatań saqtaǵany jáne áýe jolaýshylary úshin qaterdi barynsha tómendetkeni belgili», dedi D.Abaev. Vedomstvo basshysy úsh ushaq ta ár túrge jatatyndyqtan, másele isten shyǵý júıesine baılanysty emes ekenin aıtty. «Memleket halyqaralyq áýe jelileriniń de, ishki áýe jelileriniń de qaýipsizdigin qalt etpeı qadaǵalaıdy. Azamattyq avıasııanyń ushý qaýipsizdigine arnalǵan tutas baǵdarlama bar. Úkimet pen Azamattyq avıasııa komıteti HAAU-men (Halyqaralyq azamattyq avıasııa uıymy) tyǵyz jumys isteıdi. Atalǵan uıymmen qol qoıǵan barlyq qajetti nusqaýlyqtardy Qazaqstan oryndaıdy», dep sendirdi mınıstr.
Qyzmet kórsetý ortalyqtary kóbeıedi
«Biz arnaıy HQO-larda 700 myńǵa jýyq júrgizýshi kýáligin berip, 3,5 mıllıonǵa jýyq memlekettik qyzmet kórsettik. Barlyǵyn avtomattandyrdyq. Arnaıy HQO-lar saldyq. Árıne, mundaı arnaıy HQO-lar bar óńirde jumys isteı bermeıtini ókinishti. Bul mekemeler 12 qalada bar. Qazir osy úderisti ári qaraı jalǵastyrýdamyz. Aǵymdaǵy jyldyń ishinde taǵy eki HQO-ny iske qosamyz dep oılaımyn», dedi mınıstr. D.Abaev «erekshe» nómirlerge qatysty da oıymen bólisti. «Búginde memleket qazynasyna osyndaı «ádemi» nómirlerdi satýdan 5,3 mıllıard teńge tústi», dedi ol.
Mınıstr sondaı-aq, jańa «El Arna» telearnasyn iske qosý týraly da aıtty. «27 naýryzda biz «El Arnany» iske qosamyz. Bul arnada qazaqstandyq kórkem jáne derekti fılmder úzdiksiz kórsetiletin bolady. Tek qazaqstandyq kınolar. Bul bizdiń telearnalardyń taratý jelisinen oryn taba almaı júrgen otandyq fılmderdi ekranǵa shyǵarýǵa múmkindik syılaıdy», dedi mınıstr.
Ázirlegen Dýman ANASh, «Egemen Qazaqstan»