Qytaılyq týrıster Astanada ótetin EKSPO halyqaralyq kórmesi kezinde Qazaqstanǵa kelýge psıhologııalyq jaǵynan ázir. Bul týraly QHR Qazaqstandaǵy Tótenshe jáne ókiletti elshisi Chjan Hanhýeı qazaqstandyq BAQ ókilderimen kezdesýinde aıtty.
– EKSPO kezinde Qazaqstanǵa keletin qytaılyq týrısterdiń sany týraly naqty eshteńe aıta almaımyn. Degenmen, qazir týrıstik operatorlar osy iske jumylyp jatyr. Qytaılyq týrıster Qazaqstanǵa saıahattaýǵa psıhologııalyq jaǵynan daıyn. Buryn olar qazaqstannyń tabıǵaty, saıahattaıtyn kórikti jerleri, tarıhı oryndary týraly onsha bile qoımaıtyn. Qazir birshama habardar,– dedi Chjan Hanhýeı.
Qytaı elshisiniń aıtýynsha, EKSPO kórmesine qytaı delegasııasy aıtarlyqtaı úlken top bolyp keledi.
Arnur Asqar, "Egemen Qazaqstan"