Eń birinshi bolyp «Án aǵa» jáne «Doroga domoı» atty týyndylar kórermenge jol tartady. «Habar» agenttigine kiretin arnada tek qana Qazaqstanda shyǵarylǵan kórkem fılmder, derekti kıno men serıaldar kórsetiledi. Munda memlekettik tildegi týyndylardyń úlesi 50%-dan kem bolmaıdy.
Olar efırge 6 saǵattyq qaıtalaýmen shyǵady. Arna basshylyǵy «Qazaqfılm» aksıonerlik qoǵamymen kelissózder júrgizip, birqatar tamasha týyndylar kórsetilimi boıynsha shart jasasty. Sondaı-aq elimizdiń jas ári daryndy mamandary da óz kınolaryn búkil halyq nazaryna usyna alady. Jańa arnanyń ákimshiligi olarmen tyǵyz jumys júrgizýge daıyn ekendigin jetkizdi.
- Biz jastardy kıno álemine baýlıtyn mekteptermen, túrli kınofestıvalderdiń ákimshiligimen qoıan-qoltyq jumys isteımiz. Usynylǵan týyndylardyń arasynda irikteý ótkizemiz. Qysqa metrajdy jáne art-haýs stılindegi fılmderdi de efırge shyǵaramyz. Bizdiń oıymyzsha, mundaı aýqymdy joba jas rejısserlerdiń sanyn arttyryp, kıno ındýstrııasynyń damýyna serpin beredi, - deıdi «El arna» arnasynyń shef-redaktory Kamıla Qamnazarova.