Mundaı jıynnyń ótýiniń ózindik sebebi bar. Sońǵy kezde ınternet jelileri arqyly balalardyń óz-ózine qol salýyn májbúrleıtin saıttar áshkere bola bastady. Onyń ústine, bala psıhologııasyna teris áser etetin oıyndar qaptady. Osyndaı keleńsizdikterdiń aldyn alý úshin Astanadaǵy «Keleshek» psıhıkalyq ortalyǵynyń mamandary Aqgúl Moldabekova men Sergeı Sovetkın ata-analarǵa ınternettiń teris yqpalyn, oıyndar men áleýmettik jelilerdiń keri áserin túsindirdi. Bul rette oblystyq bilim basqarmasynyń basshysy Balym Izbasarova tehnologııanyń damyǵan ǵasyrynda balany teris aqparattardan qorǵaý qıyndaı túskenine nazar aýdardy. «Búginde áleýmettik jelilerde «Sınıı kıt», «Tıhıı dom», «Begı ılı ýmrı» sııaqty ózine qol jumsaýǵa alyp keletin zańsyz oıyndar qaptap ketken.
Kúsh kórsetý men óz-ózine qol salýǵa alyp keletin qaýipti oıyndar aldymen Reseıde taralyp, artynan Qyrǵyzstanda jalǵasyn tapty. Al bizdiń óńirde bes balanyń atalǵan oıyndarǵa qatysqany anyqtaldy. Balalardyń óz-ózine qol salýynyń aldyn alý maqsatynda ata-analardy balalarynyń júris-turysyn qadaǵalaýǵa shaqyramyz. Problemadan teris aınalýǵa nemese elemeýge bolmaıdy. Sondyqtan balalarymyzǵa kóńil bóleıik», dedi B.Izbasarova.
Al psıholog Aqgúl Moldabekovanyń aıtýynsha, eger jetkinshek óz isine berilgen bolsa jáne onyń qyzyǵýshylyǵyn qoldaıtyn dostary bar bolsa, onda ol bala óz aldyna maqsattar men mindetter qoıa alady. Alaıda, aldymen ata-ana balalaryna jaqsy úlgi kórsete bilýi tıis. Bul rette bilim basqarmasy óńirdegi ata-analar qaýymdastyǵyn qajetti aqparatpen tolyq qamtýdy kózdep otyr. Osy ispetti túsindirý sharalary Zerendi, Jaqsy jáne Selınograd aýdandarynda da ótkizildi.
Asqar TURAPBAIULY, «Egemen Qazaqstan»
Aqmola oblysy