«Astana» men «Shahter» Eýropanyń bedeldi klýbtyq týrnıriniń toptyq kezeńinde óner kórsetti. Osy jetistikke qarap, keıbir sheneýnikter qazaq fýtboly damyp jatyr dep oılaıtyn sekildi kórinedi. Atalǵan klýbtar jaqsy nátıje kórsetse, birinshi kezekte bilikti bapker men legıonerlerdiń arqasy.
Keıde klýbtarymyz 2-3 mıllıon dollarǵa bir legıoner satyp alǵansha, ınfraqurylymdy jaqsartsa ǵoı dep armandaısyń. Máselen, chempıonattyń sońǵy úshinshi týryndaǵy alty oıynnyń teń jartysy Astanada ótti. («Astana» – «Aqjaıyq», «Oqjetpes» – «Tobyl», «Shahter» – «Qaısar»). Qalǵan úsh matchtyń qaıda bolǵanyn tipten aıtýǵa uıat. «Aqtóbe» men «Ordabasy» mekteptiń alańynda oınady. «Taraz» Almatynyń «Qaırat» komandasyn «Ulan» stadıonynda qabyldasa, «Atyraý» men «Ertis» jıi synǵa ushyraıtyn «Sýdremontıkte» kezdesti. Jylda kóktemdegi jaǵdaı osy. Oǵan Temirtaý men Zatobol qalalaryn qosýǵa bolady. Jıyrma bes jylda jalǵyz stadıon saldyq. Bizdiń basshylar stadıon degen mindetti túrde 30-40 myń adamǵa arnalǵan bolý kerek dep oılaıtyn sekildi. Qazaqstannyń jaǵdaıynda 8-10 myń kórermen otyratyn stadıondar da jetkilikti. Bastysy, alańy qolaıly, ÝEFA talaptaryna saı bolsa bolǵany. Tipti jańadan stadıon salmaı-aq, burynǵy alańdardy jóndep, tósenishterin aýystyryp, jaryǵyn ońdap qoısa da jetip jatyr edi ǵoı. Eshqandaı jaǵdaı jasalmaǵan soń, fýtbolshylardan nátıjeni qalaı talap etemiz? Eýropadan kelgen kez kelgen fýtbolshy men bapkerlerden suhbat ala qalsańyz, osy problemany aıta jóneledi.
Ulystyń Uly kúninde Qazaqstan men Kıpr quramalary joldastyq kezdesý ótkizdi. Bul Aleksandr Borodıýktiń bas bapker retinde debıýttik matchy bolatyn. Oıyndy asyǵa kúttik. Biraq birde-bir translıasııa joq. Telearna turmaq, ǵalamtordaǵy saıttardyń ózi kórsetpedi. Youtube jelisin qaıta-qaıta aqtarýmen ýaqytymyz ótti. Osyndaı qarapaıym máselelerdi retke keltirmesek, otandyq fýtboldyń damyǵanyn jaqyn arada kórmeıtin shyǵarmyz.
Aıtpaqshy, Kıpr quramasymen kúsh synasqan bizdiń fýtbolshylarymyz 1:3 esebimen jeńilip qaldy. Oıynda Tańat Nóserbaev soqqan jalǵyz dopqa alań ıeleri tarapynan Nestoras Mıtıdıs, Fanos Katelarıs jáne Dımıtrıs Hrıstofı úsh golmen jaýap berdi.
Keshe keshkisin bet qattalyp jatqanda Qazaqstan qurama komandasy Erevanda 2018 jylǵy álem chempıonatynyń irikteý kezeńi aıasynda Armenııa aıaq dop sheberlerimen kúsh synasty.
Bek TО́LEÝOV,
jýrnalıst
ASTANA