Zeınetaqy júıesi AQSh úshin úlken problemaǵa aınalǵaly jatyr. Zeınetaqy kóleminiń ekonomıkaǵa aıtarlyqtaı áseri joq. Máseleniń bári halyqtyń zeınetaqy júıesine degen seniminiń álsizdiginen týyndaıtyn tolqý men osynyń nátıjesinde paıda bolatyn aktıvterden jappaı bas tartýdan bastalmaq, dep jazady Kapital.kz.
Sońǵy zertteýlerge súıensek, qazirgi tańda shamamen 1 mln amerıkalyqtyń zeınetaqy jınaǵyna qatysty josparlary ekiudaı jaǵdaıda tur. Bir qyzyǵy, bul 1 mln halyq belgili bir aımaqqa nemese áleýmettik sanatqa jatatyn top emes. Máselen, Ońtústik Karolına shtatyndaǵy osyndaı 550 myń adam burynǵy memlekettik qyzmetker bolsa, taǵy 100 myńy shahterler eken. Olardyń joǵaltqan qarajaty tıisinshe 24,1 mlrd dollar jáne 6 mlrd dollar. Bul azamattar óz zeınetaqy jınaǵyn United Workers of America qoryna jınaǵan. Qor qazirgi tańda osy qarjyny aldaǵy birneshe jylda qaıtara almaıtyn jaǵdaıda.
Bireýler atalǵan azamattardyń zeınetaqy qorynan qarjysyn qaıtaryp alýyna kúmán keltirse, endi bireýler kútkendegiden az berilýi múmkin ekenin aıtady. Atalǵan qor basshylyǵy mundaı jaǵdaıǵa halyqtan jınaǵan aktıvti tıimdi basqara almaǵany úshin tap bolyp otyrǵan kórinedi.
Ekinshi jaǵynan, zeınetaqy júıesindegi bul kemshilik eldiń jalpy qarjy sektoryna keri áserin tıgizbek. Al AQSh-tan bastalatyn qarjy daǵdarysy barsha álemge de zııan ekeni túsinikti.
Eńbek statıstıkasy bıýrosynyń málimetinshe, 2015 jyly 75 jastan asqan azamattardyń ortasha tabysy jylyna 34,097 myń dollar bolsa, shyǵyn kólemi 34,382 dollardy quraǵan. Osyny eskersek, zeınetaqy kóleminiń bolmashy bolsa da tómendeýi zeınetkerlerdiń úshin aýyr soqqy bolyp tımek.
Endi bul zeınetkerlerge kim kómektesedi degenge kelgende, jalǵyz jol eldiń áleýmettik járdemaqysyna kelip tireledi. Degenmen, qazirgi tańda AQSh áleýmettik tólem júıesi onsyz da quldyraýdyń az-aq aldynda tur. Qazirgi áleýmettik járdemaqy qory tek aldaǵy 17 jylǵa ǵana jetedi eken.
Ekinshi bir amaly 1974 jyly qurylǵan "Zeınetaqy tólemin kepildendirý korporasııasy". Bul korporasııa zeınetaqy júıesiniń osyndaı aýyr kezinde zeınetkerlerge kómektesý úshin demeýshilerdiń qarjysyna qurylǵan ınstıtýt. Degenmen, elde jappaı daǵdarys bolǵanda bul qordyń da qarjysy barshaǵa jetińkiremeıdi.