«Túzeý mekemelerinde bıznes-ınkýbator óndiristik kesheni jumys isteıdi. Kúndelikti turmysqa qajetti zattar daıyndalady, alaıda bul jaıynda kópshilik habarsyz. Jasalǵan buıymdardy halyqqa kórsetý maqsatynda kórme uıymdastyrdyq», - deıdi oblys ákiminiń birinshi orynbasary Ǵumar Dúısembaev. Sottalǵandar qolynan shyqqan san túrli buıymdar qoıylǵan kórmege 17 kásiporyn men jeke kásipkerler qatysty.
Oblystyq Qylmystyq atqarý júıesi departamentiniń sottalǵandar eńbegin uıymdastyrý tobynyń bas mamany Jangúl Otaralıevanyń aıtýynsha, túzeý mekemelerindegi azamattardy jumysqa alýǵa yntaly kásipkerler qatary jyl sanap artyp keledi. Qazir munda 80 jumys kúshimen qamtylǵan jeti kásipker qyzmet atqarady. Olar «Bıznestiń jol kartasy-2020» memlekettik baǵdarlamasy arqyly qarjylaı qoldaý sharalaryn alǵan. Sondaı-aq, óndiris aımaǵy men qyzmetkerler arzan baǵamen jalǵa beriledi. Mysaly, «Eńbek Atyraý» kásiporny qyryqqa jýyq sottalýshyny qyzmetpen qamtyp otyr. Aımaqtaǵy munaı salasy mamandarynyń bári osy jerde tigilgen kıimderdi alady.
Bıyl áıelder kolonııasynda etik tigetin seh iske qosylady degen jospar bar. Jalpy, sotty bolǵandardy jumyspen qamtýdyń tıimdi tusy – bos ýaqyttaryn paıdaly iske arnaıdy ári sol jerde kásipkerlik biliktilikterin arttyrady. Eń bastysy, eńbekaqy tólenedi. Bir aıta keterligi, ózderiniń tabystaryn otbasylaryna jiberetinder de bar.
Baqytgúl Babash, "Egemen Qazaqstan"
ATYRAÝ
Sýretti túsirgen Nurbeıbit Nuǵmanov