Áskerı tehnıka «satqan» alaıaq

Semeıde onyń osy qylmysty áre­­ketine qatysty úkim shyǵarǵan №2 sot­tyń sýdıasy Gúlnar Bınazarova­nyń aıtýynsha, uzaq jyldardan beri eńbek etip kele jatsa da, óz tájirıbesinde mun­daı jaǵdaıdy buryn-sońdy kezik­tirmepti. Sýdıa sot zalynda anyq­tap aıtqandaı, 58 jastaǵy alaıaq áske­rı tehnıkalardy satyp alamyn dep qyzyǵýshylyq tanytqandarǵa, qaǵaz­daǵy ózi jasap alǵan praıs úlgiden aýyr jáne jeńil kólik túrlerin sýre­timen kórsetip, aýksıon júrip jatyr dep aldaǵan. Áskerı tehnıkanyń baǵasyna saı, «GAZ-53» kóligin 170 myń teńgege, «Ýral» kóligi praıs-qaǵaz boıynsha 280 myń teńgege, «KamAZ» (2004 jyly shyǵarylǵan) 810 myń teń­gege, al MTZ traktoryn 410 myń teńge­ge satyp alýǵa bolady depti. Qor­­ǵa­nys mınıstrligi sizderge óte ar­zan­ǵa berip otyr dep túsindiripti» ol qar­­maǵyna ilikkenderge. Sóıtip, ol satyp alýshylarǵa aqshany esepshot­qa aýdaryńyz degendi aıtady. Satyp alýshylar bolsa, arzan tehnıkanyń sýretin kórisimen 170 myń teńgeden 1 mln-ǵa deıin aqshalaryn alaıaqtyń esep-shotyna oılanbastan aýdaryp jibergen. Sóıtip, ol úsh jyl ishinde 5 mln teńge aqsha taýyp úlgergen.

Biraq aqsha jibergender eshqandaı tehnıka qoldaryna tımeı, san soǵyp qalady. О́ıtkeni, alaıaqtyń qolyn­da eshqandaı da áskerı tehnıka bolmap­ty. Osylaısha ol óz kásibin jalǵasty­ra bermek edi, tek ótken jyldyń qara­sha aıynda ustalyp qaldy. Tergeý men sot isteri birneshe aıǵa sozyldy. Osy ara­lyqta alaıaq basyna is tús­kenin baı­qap, japa shegip, aldanyp qalǵan­dardyń barlyǵyna túgeldeı aqshalaryn qaıtaryp berýdi kózdeıdi. Sóıtip, ol sot sheshimi shyqqan kúnge deıin barlyq aqshany qaıtaryp úlgeredi.

– Japa shekkender aqshalaryn tolyq qaıtaryp aldy, – deıdi №2 sot­tyń sýdıasy Gúlnar Bınazarova. – Tek osyndaı adamǵa senip, ózgeden qaryz alsa da áskerı tehnıkalardy oı­lan­baı satyp almaq bolǵandardyń áre­keti túsiniksiz. Aqshalaryn bergen soń ǵana eshqandaı da tehnıkanyń joq ekendigine, qapyda san soǵyp qalǵan­dyqtaryna kózderi jetken.

Al sot álgi azamattyń buryn sotty bolmaǵanyn, kinásin tolyq moıyn­daǵanyn, ókinish bildirgenin, jaǵymdy minezdeletinin, sottalýshynyń tárbıe­sinde 1 kámeletke tolmaǵan balasy baryn eskeripti. Osylaısha alaıaq amnıs­tııa arqasynda bostandyqqa shyq­ty. Ol tek 2 jyl 11 aıǵa ǵana shartty túrde bas bostandyǵynan aıyryldy.

Raýshan NUǴMANBEKOVA,

jýrnalıst

SEMEI