Táltirektep taǵy da bizge qyzmet etý úshin aýystyrǵan lázim. Kólik saımanyn satatyn dúkenderdi aralap shyqtyq. Arzanyn izdeımiz. Dúnıeni dúr silkindirgen dollardyń qymbattaýy saıman alýshylardyń saǵyn syndyryp tur. Dúkendegiler «biz qosalqy bólshekterdi dollarmen satyp alamyz, saıman sodan soń qymbat», deıdi. Bir dúkende eki ıyǵyna eki kisi mingendeı jıren saqal Petka eki tetikti qatar usyndy. «Biri qytaıdiki, 17 myń teńge turady. Al, mynaý da sol Qytaıdan, biraq, bul zaýyttan shyqqan. Sapasy jaqsy, baǵasy 26 myń teńge», degen. Meniń eski mashınamnyń júrip ketýine tilektes Petka qaıta-qaıta aýystyryp áýre bolǵansha, qymbatyn alǵan jón ǵoı, deıdi.
Álgi tetiktiń ekeýi birdeı tárizdi. Eki jylda bir-aq ret qozdaıtyn apamnyń úıindegi boz qoıdyń egiz qozysy tárizdi.
Qudaı tileýińdi bergir Petkanyń tegin aqylyn tyńdap, qymbatyn aldyq. О́ıtkeni, aýystyrýdyń ózi tetiktiń qunynan qymbat. Endi as ishýge jaraǵanmen, saıman aýystyrýǵa jaramaıtyn qolymyzdy qaltamyzǵa salyp, tehnıkalyq qyzmet kórsetetin stansa izdedik. Taptyq. Munyń ishinde de tolǵan Petkanyń qandastary eken. Sharýa támam bolǵan soń ábden tozyp, jyltyrap qalǵan dońǵalaqtardy da aýystyryp almaqshymyz. Taz dońǵalaqpen taıǵanaqtap júre almaısyń. Dońǵalaq satyp turǵandar da soltústiktegi samsaǵan qaraǵaıdaı sol ulttyń ókilderi eken. Endi qalǵany ońaı. Alǵan dońǵalaqty aýystyryp alý ǵana. Bardyq. Áp-sátte ár dońǵalaqty 1,5 myń teńgeden Sashka men Kolka kózdi ashyp-jumǵansha aýystyryp berdi. Bizdiń jyrtyq qaltanyń túbinde qalǵan alty myń teńge Sashkanyń bútin qaltasyna aýysty.
Úıge qaıttyq. Kókshetaý qalasyndaǵy Kenesary kóshesiniń boıynda tóbesine qarasań tóbeńdegi qalpaǵyń kógershinniń qanatyndaı qalyqtap jerge túsetin tórt birdeı meıramhana bar. Áýeli bireýiniń janynan óttik. Jumys kúni bolsa da toı ótip jatyr eken. Esiginiń aldy tolǵan qazaq. Ádemi aq kostıým kıgen, jarqyraǵan galstýk baılaǵan qozy qaryn bireý áńgime aıtyp tur eken. Qyzyq áńgime shyǵar, mańaıyndaǵylar úıirile tyńdap tur. Kelesi meıramhananyń aldynda da dál osyndaı kórinis. Úshinshi, tórtinshisi de sol...
Dúnıeni daǵdarys uıqy-tuıqy qylyp tur deısiz siz, al, bizdiń qazaq qudaıǵa shúkir, toıda júr.
Baıqal BAIÁDILOV
Aqmola oblysy